कोल्हापूर: मजरेवाडीत जुन्या वादातून दोन गटांत तुंबळ हाणामारी; कोयते, कुऱ्हाडी चालल्याने ८ जण गंभीर जखमी

कोल्हापूर: मजरेवाडी (ता. शिरोळ) येथे जुन्या वादातून बुधवारी दुपारी एका तरुणाला मारहाण झाल्याने वाद मिटविण्यासाठी सायंकाळी एकत्र आले असता पुन्हा दोन गटात तुंबळ हाणामारी झाली. यामध्ये काठ्या, कुऱ्हाडी, कोयता, दगडांचा वापर झाल्याने यात सात ते आठ जण जखमी झाले. हाणामारीची घटना समजताच कुरुंदवाड पोलिसांचे पथक दाखल झाले. यामुळे दहशत माजविणारे फरार झाले. बुधवारी रात्री आठच्या सुमारास बस्तवाड मजरेवाडी रस्त्यावर पार कट्टा येथे ही घटना घडली. या घटनेची नोंद करण्याचे काम रात्री उशिरापर्यंत सुरू होते.

घटनास्थळावरून मिळालेल्या माहितीनुसार, किरकोळ कारणावरून काही दिवसांपूर्वी दोन गटात वाद झाला होता. पोलीसांनी दोन्ही बाजूच्या तरुणांना ताकीद करुन सोडून दिले होते. याच वादातून आठ ते दहा जणांच्या टोळक्याने बुधवारी दुपारी अक्षय पाटील (वय ३०) याला त्याच्या घरात घुसून बेदम मारहाण केली होती. हा वाद मिटविण्यासाठी सायंकाळी साडेसातच्या सुमारास बस्तवाड रस्त्यावर असलेल्या पार कट्टा येथे दोन्ही बाजूचे लोक जमले होते.

या ठिकाणी पुन्हा वादावादी होवून हाणामारीला सुरुवात झाली. मोठा वाद झाल्याचे समजताच कुरुंदवाड पोलिस ठाण्याचे सहाय्यक पोलीस निरीक्षक शितलकुमार डोईजड, उपनिरीक्षक जीवन पाटील यांनी पथकासह घटनास्थळी धाव घेत जमावाला पांगविले. दहशत माजविणारे फरार झाले असून पोलीस त्यांची नावे शोधून धरपकड रात्री उशिरापर्यंत सुरू होती.