अंधेरी उड्डाणपुलाच्या दुरस्तीचा खर्च वाढून १३०.३६ कोटींवर पोहोचला; महापालिकेने स्थायी समितीकडे मागितली मंजुरी

मुंबईतील पश्चिम द्रुतगती महामार्गावरील (Western Express Highway) महत्त्वाच्या असणाऱ्या अंधेरी उड्डाणपुलाच्या (जोग फ्लाईओव्हर) दुरस्ती आणि बळकटीकरणाच्या कामाचा खर्च आता वाढून तब्बल १३०.३६ कोटी रुपयांवर पोहोचला आहे. या प्रकल्पाच्या खर्चात दुसऱ्यांदा वाढ झाल्यामुळे बृहन्मुंबई महानगरपालिकेने (BMC) आता सुधारित खर्चास आणि मुदतवाढीसाठी स्थायी समितीकडे अधिकृत मंजुरी मागितली आहे.

मिळालेल्या सविस्तर माहितीनुसार, या उड्डाणपुलाच्या दुरस्तीचा मूळ करार २०२४ मध्ये अंदाजे ९३ कोटी रुपयांना देण्यात आला होता. त्यानंतर कामाच्या व्याप्तीत आणि तांत्रिक निकषांमध्ये बदल झाल्यामुळे पहिल्या फेरबदकानंतर हा खर्च वाढून सुमारे ९५ कोटी रुपयांवर गेला होता. आता अतिरिक्त तांत्रिक सल्लागारांच्या शिफारसी आणि पुलाच्या संरचनेतील वाढीव बळकटीकरणाच्या कामांमुळे खर्चात दुसऱ्यांदा मोठी वाढ झाली असून, हा खर्च १३०.३६ कोटींवर गेला आहे.

वाहतूक सुरक्षेचा प्रश्न व पुलाची ढासळलेली स्थिती लक्षात घेता महापालिकेने या कामाला वेग दिला आहे, मात्र वारंवार होणाऱ्या उशीरामुळे या प्रकल्पाची अंतिम मुदत आता नोव्हेंबर २०२६ पर्यंत वाढवण्याचा प्रस्ताव ठेवण्यात आला आहे. स्थानिक नागरिक व प्रवासी वर्गाकडून या प्रकल्पाचे काम युद्धपातळीवर लवकरात लवकर पूर्ण करण्याची मागणी होत असून, वाढलेल्या खर्चामुळे महापालिकेच्या कारभारावर प्रश्नचिन्ह उपस्थित केले जात आहे.