Accident News : दवाखान्यात जात असताना पती- पत्नीवर काळाची झडप; विरुद्ध दिशेने आलेल्या मालवाहू वाहनाची धडक

Nagpur : रुग्णालयात नेत्र तपासणीसाठी जात असताना पती- पत्नीवर काळाने झडप घातली आहे. विरुद्ध दिशेने भरधाव वेगाने आलेल्या छोट्या मालवाहू वाहनाने दुचाकीला जोरदार धडक दिली. यात पतीचा जागीच मृत्यू झाला. तर पत्नीचा उपचारादरम्यान मृत्यू झाल्याची घटना सावनेर-काटोल मार्गावरील तेलकामठी शिवारातील वळण रस्त्यावर घडली आहे.

नागपूरच्या कळमेश्वर तालुक्यातील नांदिखेडा येथील राजकुमार जंगलू कुंभारे (वय ५०) व इंदू राजकुमार कुंभारे (वय ४७) असे मृत दाम्पत्याचे नाव आहे. सदर अपघात ८ सप्टेंबरला सकाळी साडेदहा वाजेच्या सुमारास घडला. कुंभारे दाम्पत्य डोळ्यांची तपासणी करण्यासाठी सावनेर येथे रुग्णालयात जात होते. गावापासून काही अंतरावर असलेल्या तेलकामठी शिवारातील वळण रस्त्यावर भीषण अपघात होऊन दोघांचा मृत्यू झाला.

भरधाव वेगाने आलेल्या वाहनाने दिली धडक

कुंभारे दाम्पत्य दुचाकीने जात असताना सावनेरहून काटोलकडे विरुद्ध दिशेने वेगात जाणाऱ्या मालवाहू वाहनाने त्यांच्या दुचाकीला जोरात धडक दिली. यामुळे दोघेजण रस्त्यावर फेकले गेले होते. यात गंभीर दुखापत झाल्याने राजकुमार कुंभारे यांचा जागीच मृत्यू झाला होता. तर पत्नी इंदुबाई या गंभीर जखमी झाल्याने नागरिकांनी रुग्णालयात उपचारासाठी दाखल करण्यात आले होते. मात्र काही तासातच त्यांचा देखील मृत्यू झाला.

वाहन चालक ताब्यात दरम्यान मालवाहू वाहनाने दुचाकीला धडक दिल्यानंतर चालकाचा मालवाहू वाहनावरील ताबा सुटला. यानंतर ते वाहन रोडलगत उलटले. यात वाहनाचा चालक देखील किरकोळ जखमी झाला होता. उपचारानंतर पोलिसांनी त्याला चौकशीसाठी ताब्यात घेतले. मात्र सावनेर- काटोल मार्गाचा काही भाग अरुंद आहे. दोन्ही बाजूंनी झुडपे असल्याने या मार्गावरील काही वळण धोकादायक ठरत असल्याचे सांगितले जात आहे.