परभणी: पालममधील दोन तरुण गोदावरी नदीत बुडाले, गणेश विसर्जनादरम्यान धानोरा काळे येथे घडली दुर्दैवी घटना

परभणी: जिल्ह्यातील पालम शहरातून गणेश विसर्जन करण्यासाठी गोदावरी नदीपात्रात गेलेली दोन लहान मुले व तरुण पाण्यात बुडाल्याची अत्यंत दुर्दैवी आणि हृदयद्रावक घटना घडली आहे. २५ सप्टेंबर रोजी सायंकाळी ६ वाजण्याच्या सुमारास पूर्णा तालुक्यातील धानोरा काळे येथील गोदावरी नदीपात्रात ही दुर्घटना घडली. या घटनेमुळे पालम शहरासह संपूर्ण परिसरात मोठी शोककळा पसरली असून हळहळ व्यक्त होत आहे.

नदीत बुडालेल्या युवकांची नावे मुंजाजी आश्रोबा घोरपडे (वय अंदाजे १७ वर्ष) आणि गजानन रामदास घोरपडे (वय अंदाजे २० वर्ष, दोन्ही रा. पालम) अशी आहेत. मिळालेल्या सविस्तर माहितीनुसार, हे दोघे युवक पालम शहरातून आपल्या गणेश मंडळाच्या इतर कार्यकर्त्यांसोबत श्रींची मूर्ती विसर्जित करण्यासाठी धानोरा काळे येथील गोदावरी नदीच्या घाटावर गेले होते. धानोरा काळे येथील नदीवरील पुलावरून श्रींची मूर्ती पाण्यात सोडत असताना, अचानक पाय घसरून हे दोन्ही तरुण थेट नदीच्या प्रवाहात खाली पडले.

या दोन्ही मुलांना डोळ्यांसमोर पाण्यात पडताना पाहताच, घटनास्थळी उपस्थित असलेल्या इतर तीन ते चार साहसी युवकांनी त्यांना वाचवण्यासाठी तात्काळ कोणतीही भीती न बाळगता पाण्यात उड्या घेतल्या. मात्र, पाण्याचा प्रवाह आणि खोली जास्त असल्यामुळे शोध घेऊनही त्या युवकांना दोन्ही मुले पाण्यात कुठेही सापडली नाहीत. घटनेची माहिती मिळताच स्थानिकांनी आणि प्रशासनाने तातडीने धाव घेतली.

या दोन्ही युवकांचा शोध घेण्यासाठी रात्री ९:३० वाजेपर्यंत युद्धपातळीवर प्रयत्न सुरू होते. प्रशासनाकडून राष्ट्रीय आपत्ती प्रतिसाद दलाला (NDRF) देखील पाचारण करण्यात आले होते; मात्र निर्धारित वेळेत एनडीआरएफचे पथक घटनास्थळी पोहोचू शकले नव्हते. रात्री ९:१५ वाजेपर्यंतही मदत पथक पोहोचले नसल्याची माहिती समोर आली. घटनेची माहिती मिळताच पालम पोलीस ठाण्याचे पोलीस निरीक्षक आदित्यकुमार लोणीकर हे आपल्या ताफ्यासह व पोलीस कर्मचाऱ्यांसह तातडीने घटनास्थळी दाखल झाले. त्यांनी परिस्थितीचा आढावा घेत स्थानिक गोताखोरांच्या मदतीने मुलांचा शोध घेण्याचे काम सुरू ठेवले.

दरम्यान, अशा प्रकारच्या सार्वजनिक व धार्मिक सणांच्या वेळी उद्भवणाऱ्या आपत्कालीन परिस्थितीचा सामना करण्यासाठी पालम शहरातील स्थानिक प्रशासनाकडे किंवा शासकीय यंत्रणेकडे कोणतीही ठोस पूर्वतयारी किंवा पुरेशी व्यवस्था नसल्याचा गंभीर आरोप संतप्त नागरिकांकडून केला जात आहे. आपत्कालीन मदतीसाठी पालम नगरपंचायत, तहसील कार्यालय तसेच गंगाखेड येथील नगरपालिका आणि इतर यंत्रणेकडे तातडीने मदत मागविण्यात आली होती. परंतु, गंगाखेड येथे आधीच मोठ्या प्रमाणावर बंदोबस्त आणि नगरपालिकेचे कर्मचारी इतरत्र गुंतले असल्याचा निरोप मिळाल्याची माहिती पोलीस निरीक्षक आदित्यकुमार लोणीकर यांनी दिली.

या दुर्घटनेत प्रशासनाच्या ढिसाळ कारभाराबाबत आणि एनडीआरएफच्या उशीरा पोहोचण्याबाबत नागरिकांमधून तीव्र संताप व्यक्त होत आहे. रात्री उशिरापर्यंत गोदावरी नदीपात्रात बेपत्ता झालेल्या दोन्ही युवकांचा शोध घेण्याचे काम सुरूच होते, परंतु अंधारामुळे व कठीण परिस्थितीमुळे बचावकार्यात मोठे अडथळे निर्माण झाले. गणेशोत्सवाच्या आनंदावर या दुर्दैवी घटनेमुळे संपूर्ण परभणी जिल्ह्यात काळे सावट पसरले आहे.