Uttarkashi Tunnel Accident : उद्या मजूरांच्या सुटकेची शक्यता, दिवाळीच्या पहिल्या दिवसापासून बोगद्यात अडकलेत 41 मजूर

Uttarkashi Tunnel Accident : आजुबाजूला काळाकुट्ट अंधार, डोक्यावर हेल्मेट आणि नजरेत प्रचंड भीती... उत्तरकाशीसह देशातील प्रत्येक जण 41 मजुरांच्या सुखरुप सुटकेसाठी प्रार्थना करतोय. गेल्या अकरा दिवसांपासून देश ज्यांच्या सुखरूप परतण्यासाठी प्रार्थना करतोय. उत्तराखंडच्या उत्तकाशीतील बोगद्यात 41 मजूर सुटकेची वाट पाहत आहे. उत्तरकाशीमध्ये सिलक्यारा बोगद्यात हे सगळे मजूर 264 तासांपासून जगण्यासाठी संघर्ष करत आहेत. आणि बाहेर शेकडो हात त्यांचा हाच संघर्ष यशस्वी व्हावा यासाठी प्रयत्न करत आहेत. अधिकाऱ्यांनी म्हटलं आहे की, मजूर उद्याचा सूर्योद्य पाहू शकतील, अशी शक्यता आहे.

लवकरच मजूरांची सुटका होणार

बचाव अधिकाऱ्यांकडून मिळालेल्या ताज्या माहितीनुसार, डोंगरावर बोगदा खणण्याचं काम वेगाने सुरु आहे. आज रात्री किंवा उद्या सकाळपर्यंत मजुरांची सुटका होण्याची शक्यता सर्व काही सुरळीत पार पडलं तर, मजूर उद्याचा सूर्योद्य पाहू शकतील, अशी माहिती बचावकार्यातील अधिकाऱ्यांनी दिली आहे. सुमारे 40 किमीपर्यंत बोगदा खोदला गेला आहे. आणखी 58 ते 60 किमीपर्यंत ड्रिलिंग होणरा आहे.

Pune Drought News : पुणे जिल्ह्यातील ११ तालुके दुष्काळी घोषित; 'या' तालुक्यांचा यादीत समावेश

11 दिवस मजूर बोगद्यामध्ये अडकलेले

12 नोव्हेंबरला म्हणजे ऐन दिवाळीच्या दिवशी सकाळी उत्तरकाशीमधल्या सिलक्यारा बोगद्यात 41 मजूर आपल्या नेहमीच्या कामासाठी पोहोचले. बोगद्याचं काम बऱ्यापैकी पूर्ण होत आल्याने बोगद्यात वीज आणि पाण्याची व्यवस्था होती. डोक्यावर हेल्मेट घालून प्रत्येकजण कामात मग्न होता आणि अचानक मोठा आवाज झाला. या आवाजासोबत मातीचा भला मोठा ढिगारा खाली आला आणि सगळे मजूर त्या ढिगाऱ्याच्या मागे अडकले. 

264 तास उलटल्यानंतरही बचावकार्य सुरुच

पहिल्या दिवसापासून मजूरांशी संपर्क साधण्याचं प्रयत्न सुरू झाले, पण ही लढाई सोपी नव्हती. दोन दिवसांनंतर या मजूरांशी संपर्क साधून, त्यांच्यापर्यंत एक छोटी पाईपलाईन पोहोचवण्यात यंत्रणा यशस्वी ठरल्या. या पाईपलाईनच्या माध्यमातून सुका मेवा, पाणी, औषधं मजूरांपर्यंत पोहोचवणं शक्य झालं. पण, मजूरांना बाहेर काढण्यासाठी मात्र अजूनही मार्ग सापडत नाहीय. मजूरांपर्यंत पोहोचण्याचे सर्वतोपरी प्रयत्न केले जात आहेत.