उच्च न्यायालयाच्या लिपिक भरती परीक्षा आणि टायपिंग स्किल टेस्टमध्ये तांत्रिक बिघाडाचा महाघोंधळ; सर्व्हर डाऊन, नादुरुस्त कीबोर्डमुळे संतप्त विद्यार्थ्यांचे छत्रपती संभाजीनगरमध्ये साडेबारा तास ठिय्या आंदोलन

मुंबई उच्च न्यायालयाच्या लिपिक पदाच्या भरतीसाठी रविवारी (ता. १६) घेण्यात आलेल्या ऑनलाइन टंकलेखन (टायपिंग स्किल टेस्ट) परीक्षेत विविध केंद्रांवर प्रचंड तांत्रिक बिघाड झाल्याने मोठा गोंधळ उडाला. छत्रपती संभाजीनगरसह कल्याण, नांदेड आणि राज्यातील इतर काही प्रमुख परीक्षा केंद्रांवर संगणक प्रणालीत बिघाड, सर्व्हर डाऊन होणे, की-बोर्ड खराब असणे आणि परीक्षा सुरू असतानाच अचानक स्क्रीन लॉग-आऊट होऊन वेळेआधीच परीक्षा सबमिट झाल्याच्या प्रकारामुळे हजारो विद्यार्थ्यांचे भविष्य टांगणीला लागले.

मिळालेल्या सविस्तर माहितीनुसार, मुंबई उच्च न्यायालयाच्या लिपिक पदाच्या मुख्य लेखी परीक्षेत उत्तीर्ण झालेल्या उमेदवारांची टायपिंग स्किल टेस्ट विविध सत्रांमध्ये आयोजित करण्यात आली होती. मात्र, परीक्षा केंद्रांवर पोहोचलेल्या विद्यार्थ्यांना अत्यंत निकृष्ट दर्जाच्या आणि नादुरुस्त सुविधांचा सामना करावा लागला. अनेक केंद्रांवर संगणकांचे की-बोर्ड नादुरुस्त होते, काहींची बटणे तुटलेली होती, तर सॉफ्टवेअर अत्यंत संथ गतीने चालत असल्यामुळे विद्यार्थ्यांना टायपिंग करणे अशक्य झाले. या तांत्रिक त्रुटींमुळे परीक्षा सुरू झाल्यानंतर अवघ्या काही मिनिटांतच सिस्टीम बिघडली आणि अनेक विद्यार्थी स्वयंचलितरीत्या (Auto-submission) लॉग-आऊट झाले, ज्यामुळे त्यांना थेट नापास किंवा अपात्र ठरवण्यात आल्याचा आरोप विद्यार्थ्यांनी केला.

या मनमानी कारभारामुळे आणि प्रशासनाच्या ढिसाळ नियोजनामुळे राज्यभरातून आलेल्या संतप्त उमेदवारांचा उद्रेक झाला. छत्रपती संभाजीनगर येथील परीक्षा केंद्राबाहेर हजारो विद्यार्थी आक्रमक होत रस्त्यावर उतरले आणि त्यांनी न्याय मिळेपर्यंत मागे न हटण्याचा निर्णय घेत तीव्र ठिय्या आंदोलन सुरू केले. या आंदोलनात विद्यार्थ्यांच्या समर्थनार्थ विविध राजकीय व सामाजिक नेतेही सहभागी झाले होते. संतप्त विद्यार्थ्यांनी जोपर्यंत तांत्रिक बिघाड झालेल्या सत्रांची पुनरपरीक्षा (Retest) घेतली जात नाही आणि दोषी यंत्रणेवर कारवाई होत नाही, तोपर्यंत आपला लढा सुरूच राहील असा इशारा दिला असून, या प्रकारामुळे न्यायालयीन परीक्षांच्या आयोजनातील त्रुटी पुन्हा एकदा ऐरणीवर आल्या आहेत.