T20 WC: सेमीफायनल शर्यतीतून ऑस्ट्रेलिया आऊट! मॅन ऑफ द टूर्नामेंटबाबत माजी क्रिकेटपटूचं भाकीत

टी20 वर्ल्डकप 2026 स्पर्धेच्या जेतेपदासाठी एकूण 20 संघ शर्यतीत आहे. प्रत्येक दिवशी होणाऱ्या सामन्यानंतर स्पर्धा पुढे जात आहे. तसेच या स्पर्धेची रंगतही वाढणार आहे. साखळी फेरीचे सामने सुरू असून सुपर 8 फेरीत कोणते संघ जागा मिळवणार याची उत्सुकता आहे. असं असताना या स्पर्धेच्या उपांत्य फेरीत कोण जागा मिळवेल? याचं भाकीत आता वर्तवण्यात आलं आहे. हे भाकीत कोणी ज्योतिष्याने नाही तर माजी क्रिकेटपटूने वर्तवलं आहे. दक्षिण अफ्रिकेचा माजी वेगवान गोलंदाज वेन पार्नेल याने टी20 वर्ल्डकप स्पर्धेच्या सुरूवातीलाच उपांत्य फेरीत कोणते संघ जातील याचं भविष्य कथन केलं आहे. वेन पार्नेल यांचं भाकीत पाहता अनेकांना आश्चर्याचा धक्का बसला आहे त्याचं कारणही तसंच आहे. त्यांनी उपांत्य फेरीच्या शर्यतीतून ऑस्ट्रेलियाला बाहेर केलं आहे. म्हणजेच ऑस्ट्रेलियाचा प्रवास सुपर 8 फेरीतच संपुष्टात येईल असं म्हंटलं आहे. मागच्या पर्वातही असंच झालं होतं.

वेन पार्नेल यांनी टी20 वर्ल्डकप 2026 उपांत्य फेरीचे चार संघांची नाव सांगताना सर्वप्रथम भारताला पसंती दिली. भारताचा सध्याचा फॉर्म पाहता हे भाकीत काही चुकीचं आहे असं म्हणता येणार नाही. पण त्यांनी या शर्यतीतून ऑस्ट्रेलियाला बाहेरचा रस्ता दाखवला आहे. तर दक्षिण अफ्रिका, इंग्लंड आणि न्यूझीलंड यांना पसंती दिली आहे. त्यामुळे यावेळी ही स्पर्धा रंगतदार होणार यात काही शंका नाही. पण त्यांचं भाकीत खरं ठरतं का हे देखील पाहणं महत्त्वाचं आहे. सुपर 8 फेरीत तगडे संघ असणार आहे. त्यामुळे जय पराजय वाटतो तितका सोपा नसेल.

टी20 वर्ल्डकप स्पर्धेत प्लेयर ऑफ द टूर्नामेंटचा मानकरी भारतीय कर्णधार सूर्यकुमार यादव असेल असं त्यांनी सांगितलं. सध्याचा सूर्यकुमार यादवचा फॉर्मच तसा आहे. त्याला न्यूझीलंडविरुद्धच्या टी20 मालिकेत सूर गवसला. त्यानंतर अमेरिकेविरूद्धच्या सामन्यात एकट्याने खिंड लढवली होती. त्यामुळे विजय मिळवणं सोपं झालं. तर सर्वाधिक विकेट घेणारा खेळाडू कोण असेल? याबाबत त्यांनी दोन नावं घेतली. वेस्ट इंडिजचा रोमारिया शेफर्ड आणि भारताचा फिरकीपटू वरूण चक्रवर्ती हे सर्वाधिक विकेट घेतील. पण या दोन नावांपैकी त्यांनी वरूण चक्रवर्तीच्या नावाला पसंती दिली. रोमारियो शेफर्डने पहिल्याच सामन्यात हॅटट्रीक घेतली होती. तसेच पाच विकेट नावावर केल्या आहेत.