ठाणे:  लोकल प्रवासादरम्यान पतीला धक्काबुक्की व शिवीगाळ केल्याने संतापलेल्या मनसे महिला पदाधिकाऱ्याने परप्रांतीय महिलेच्या कानशिलात लगावली

ठाणे: पालघर-माहीम रोडवरील मनसे कार्यालयात कामगारांच्या प्रश्नावर बैठक आयोजिली होती. ही बैठक आटोपल्यानंतर जिल्हाप्रमुख समीर मोरे यांनी मनसेचे माजी शहरप्रमुख आणि मनसे नेते अविनाश जाधव यांचे निकटवर्तीय सुनील राऊत यांच्यावर प्राणघातक हल्ला केला. या हल्ल्यात राऊत जखमी झाले आहेत.कामगार सेनेचे उपाध्यक्ष नीलेश पाटील यांच्यासमोरच ही हाणामारी झाली. या प्रकरणामुळे पालघर मनसेमधील अंतर्गत वाद चव्हाट्यावर आला असून, पालघर पोलिस पुढील तपास करीत आहेत.

पालघर शहरातील माहीम रोडवर असलेल्या मनसे कार्यालयात पालघर शहरातील एका कंपनीमधील कामगारांच्या प्रश्नावर बैठकीचे आयोजन मंगळवारी करण्यात आले होते. त्या बैठकीला मुंबईमधील कामगार सेनेचे उपाध्यक्ष नीलेश पाटील उपस्थित राहणार होते.
या बैठकीच्या आधीच जिल्हाध्यक्ष समीर मोरे कार्यालयात आल्यानंतर त्यांनी सभांच्या बाबतीत मला कुठलीही कल्पना दिली जात नसल्याचे आक्षेप नोंदवले. यावर दोन गटांत शाब्दिक बाचाबाची झाली. कामगारांच्या प्रश्नावर बैठक पार पडल्यावर उपाध्यक्ष पाटील उपस्थित असताना पुन्हा जिल्हाध्यक्ष मोरे यांनी वाद घातला.

मनसे तालुकाध्यक्ष तथा केळवेचे सरपंच संदीप किणी यांची कॉलर पकडून त्यांना शिवीगाळ केल्याचे त्यांनी 'लोकमत'ला सांगितले.
यावेळी कार्यालयात बसलेल्या सुनील राऊत यांना समीर मोरे आणि त्यांच्या सोबत असलेल्या ८-९ लोकांनी जोरदार मारहाण केली. झेंडा असलेल्या काठीचा जोरदार प्रहार सुनील राऊत यांच्या डोक्यात करण्यात आल्याने ते गंभीर जखमी झाले.
मुंबईमधील कामगार सेनेचे उपाध्यक्ष नीलेश पाटील ह्यांच्या उपस्थितीत हा प्रकार घडल्याने मनसेमधील हा वाद पुढे वाढणार असल्याची चिन्हे दिसत आहेत.

जखमी राऊत यांना पालघरच्या खासगी रुग्णालयात दाखल करण्यात आले आहे. पालघर पोलिस स्टेशनचे साहाय्यक पोलिस निरीक्षक मल्हार थोरात यांनी घटनास्थळी धाव घेत पुढील तपास सुरू केला आहे.