बंगळुरू: बंद घरात सापडला महिलेचा हाडांचा सांगाडा; मृतदेह वर्षभर पडून राहिल्याने पोलिसांनाही बसला धक्का.

बंगळुरू: शहरातील बागलगुंटे परिसरात एका बंद घरात ५२ वर्षीय महिलेचा मृतदेह सापडला आहे. हा मृतदेह हाडांचा सापळा बनला आहे. महिलेची ओळख ५२ वर्षीय दाक्षायिनी म्हणून झाली. दाक्षियानीचा मृत्यू साधारण १ वर्षापूर्वी झाला असावा असा पोलिसांना अंदाज आहे. या महिलेचा मृतदेह इतके दिवस घरात पडून होता. त्यामुळे त्याचे सापळ्यात रुपांतर झाले. या घटनेची कुणालाही कल्पना नव्हती. ही घटना पाहून अनेकांनी आश्चर्य व्यक्त केले. घरात एक वर्ष महिलेचा मृतदेह पडून सापळा बनला पण कुणालाही याची भनकही लागली नाही.

मृत महिला दाक्षायिनीला एक मुलगी आहे. महिलेची मुलगी आणि जावई मागील वर्षभरात एकदाही दाक्षायिनी यांना भेटायला आले नव्हते. तपासात मुलीने जे कारण सांगितले ते हैराण करणारे होते. वर्षभरापूर्वी घरात झालेल्या भांडणांनंतर मी आईशी बोलणे सोडले होते. मी तेव्हापासून कधीही आईला फोन केला नाही. रागात आईनेही तिचा मोबाईल नंबर बदलला होता. त्यानंतर मी कधीही आईची विचारपूस केली नाही. ती कुठे आणि कशी आहे हेदेखील पाहिले नाही. वर्षभरात कधीही आईला पाहायला आली नव्हती आणि आमचे बोलणेही झाले नाही असं तिने पोलिसांना सांगितले.

पती, मुलाच्या मृत्यूनंतर महिला नैराश्यात
माहितीनुसार, दाक्षायिनी एकट्याच राहत होत्या. पती आणि मुलाच्या मृत्यूनंतर त्या सातत्याने नैराश्यात होत्या. १० वर्षापूर्वी दाक्षायिनी यांच्या पतीचे निधन झाले होते. त्यानंतर मुलाचाही कॅन्सरने मृत्यू झाला होता. मुलगी वादानंतर घर सोडून गेली आणि तेव्हापासून दाक्षायिनी घरात एकट्या होत्या. या महिलेचा मृत्यू १ वर्षापूर्वी झाल्याचा अंदाज वर्तवला जात आहे. परंतु त्यांच्या आसपास राहणाऱ्या शेजाऱ्यांनाही या घटनेची भनक लागली नाही त्याचे आश्चर्य व्यक्त केले जात आहे. घर आतून बंद होते आणि दाक्षायिनी यांचा मृतदेह घरात पडून पडून हाडांचा सापळा बनला. या प्रकरणात पोलीस सर्व अँगलने तपास करत आहेत. दाक्षायिनी यांच्या मृत्यूचे खरे कारण शोधण्याचं आव्हान पोलिसांसमोर आहे.