गुरु-शिष्य नात्याला काळिमा! जळगावात चौथीतील चिमुरडीवर शिक्षकाचा अत्याचार, विरोध केल्यास आई-वडील मरतील अशी द्यायचा धमकी

जळगाव: जळगाव जिल्ह्यातील धरणगाव तालुक्यातून गुरु-शिष्य नात्याला पुरता काळिमा फासणारी एक अत्यंत संतापजनक आणि धक्कादायक घटना समोर आली आहे. एका जिल्हा परिषद शाळेतील नराधम शिक्षकाने इयत्ता चौथीत शिकणाऱ्या अवघ्या ९-१० वर्षांच्या निष्पाप विद्यार्थिनीचा लैंगिक छळ केल्याचा धक्कादायक प्रकार उघडकीस आला आहे. याप्रकरणी पीडित मुलीच्या आईने दिलेल्या तक्रारीवरून धरणगाव पोलीस ठाण्यात नराधम शिक्षकाविरुद्ध पोक्सो (POCSO) कायद्यान्वये गुन्हा दाखल करून त्याला अटक करण्यात आली आहे. नंदलाल नारायण मराठे असे या नराधम शिक्षकाचे नाव आहे.

मिळालेल्या माहितीनुसार, पीडित मुलगी ही तिच्या कुटुंबासह धरणगाव तालुक्यातील एका गावात राहते आणि स्थानिक जिल्हा परिषद शाळेत इयत्ता चौथीच्या वर्गात शिकते. संशयित आरोपी शिक्षक नंदलाल मराठे हा रोज सकाळी शाळा भरण्यापूर्वी १० वाजता त्या चिमुरडीला शाळेत झाडू मारण्याच्या बहाण्याने एकटीला बोलावून घ्यायचा. शाळेत कोणीही नसल्याचा गैरफायदा घेऊन तो तिच्यासोबत अत्यंत घृणास्पद कृत्य करायचा. इतकेच नव्हे, तर तो तिला स्वतःच्या मोबाईलवर अश्लील व्हिडिओ दाखवून तिचा मानसिक आणि शारीरिक छळ करायचा. नुकत्याच पार पडलेल्या शैक्षणिक वर्षाच्या शेवटच्या दिवशी, म्हणजेच ३० एप्रिल २०२६ रोजी देखील या नराधमाने शाळेत तिच्यावर अत्याचार केला होता.

हा धक्कादायक प्रकार गेल्या दोन वर्षांपासून सातत्याने सुरू होता. चिमुरडीने या कृत्याला विरोध केल्यास हा शिक्षक तिला बेदम मारहाण करायचा. "जर हा प्रकार कोणाला सांगितलास, तर तुझे आई-वडील मरून जातील," अशी भयंकर धमकी देऊन तो तिला गप्प बसवायचा, ज्यामुळे ती प्रचंड घाबरली होती.

शाळेला उन्हाळी सुट्ट्या लागल्यानंतर पीडित मुलगी सुट्ट्या घालवण्यासाठी तिच्या मावशीच्या घरी गेली होती. तिथे अचानक तिची प्रकृती खालावली आणि तिने जेवण करणे पूर्णपणे बंद केले. तिच्या वागण्यात बदल झाल्याचे पाहून नातेवाईकांनी तिला विश्वासात घेऊन प्रेमाने विचारपूस केली. तेव्हा त्या चिमुरडीने रडत रडत तिच्यासोबत घडलेला हा सर्व भयानक प्रकार नातेवाईकांना सांगितला. हे ऐकून कुटुंबीयांच्या पायाखालची जमीनच सरकली. त्यांनी तातडीने धरणगाव पोलीस ठाणे गाठून नराधम शिक्षकाविरोधात फिर्याद दिली. पोलिसांनी तात्काळ कारवाई करत आरोपी शिक्षक नंदलाल मराठेला बेड्या ठोकल्या असून पोलीस या प्रकरणाचा पुढील तपास करत आहेत.