लग्नात 'स्कॉर्पिओ' दिली तरी 'फॉर्च्युनर'साठी छळ! सासरच्या जाचाला कंटाळून दीपिकाने १४ महिन्यांतच संपवलं आयुष्य!

छत्रपती संभाजीनगर: लग्नात मानापानासह महागडी 'स्कॉर्पिओ' कार देऊनही सासरच्या मंडळींची हुंड्याची हाव काही मिटली नाही. "आम्हाला स्कॉर्पिओ नको, 'फॉर्च्युनर' कार पाहिजे," अशी मागणी करत सासरच्यांनी केलेल्या छळाला कंटाळून एका २४ वर्षीय नवविवाहितेने गळफास घेऊन आत्महत्या केल्याची संतापजनक घटना समोर आली आहे. दीपिका शुभम वाघ (वय २४) असे मृत विवाहितेचे नाव आहे. लग्न होऊन अवघे १४ महिने झाले असतानाच दीपिकाने हे टोकाचे पाऊल उचलल्याने सर्वत्र हळहळ व्यक्त होत आहे. या प्रकरणी सिडको ठाण्यात पतीसह सासरच्या पाच जणांविरुद्ध गुन्हा दाखल करण्यात आला आहे.

लग्नानंतर काही दिवसांतच छळ सुरू:
मिळालेल्या माहितीनुसार, जळगाव जिल्ह्यातील रहिवासी असलेल्या दीपिकाचा विवाह फेब्रुवारी २०२५ मध्ये छत्रपती संभाजीनगरमधील सिडको परिसरातील शुभम वाघ याच्याशी झाला होता. लग्नात मुलीच्या वडिलांनी आपल्या ऐपतीप्रमाणे सासरच्यांना हुंडा आणि पांढऱ्या रंगाची 'स्कॉर्पिओ' कार भेट दिली होती. मात्र, लग्न झाल्यानंतर अवघ्या काही दिवसांतच पती शुभम, सासू, सासरे आणि नणंद यांनी दीपिकाला टोमणे मारण्यास सुरुवात केली.

'फॉर्च्युनर' कार आणि ५ लाखांची मागणी:
"आम्हाला स्कॉर्पिओ कार आवडली नाही, ती परत करून तुझ्या वडिलांकडून 'फॉर्च्युनर' कार मागवून घे," असा तगादा सासरच्यांनी लावला. तसेच नवीन व्यवसायासाठी माहेरून ५ लाख रुपये रोख आणण्यासाठी दीपिकावर सतत मानसिक आणि शारीरिक दबाव टाकला जात होता. दीपिकाने ही बाब आपल्या माहेरच्यांना सांगितली होती. मुलीचा संसार वाचावा म्हणून वडिलांनी सासरच्यांची समजूत काढण्याचा प्रयत्न केला, परंतु छळ थांबला नाही. अखेर या सततच्या त्रासाला आणि छळाला कंटाळून दीपिकाने घरात गळफास लावून आपले जीवन संपवले.

पतीसह ५ जणांवर गुन्हा दाखल, ३ जण अटकेत:
घटनेची माहिती मिळताच सिडको पोलिसांनी मृतदेह ताब्यात घेऊन उत्तरीय तपासणीसाठी पाठवला. मृत दीपिकाच्या वडिलांनी दिलेल्या तक्रारीवरून पती शुभम वाघ, सासरे, सासू आणि दोन नणंद यांच्याविरुद्ध हुंडाबळी आणि आत्महत्येस प्रवृत्त केल्याचा गुन्हा दाखल करण्यात आला आहे. पोलिसांनी तात्काळ कारवाई करत पती शुभमसह ३ जणांना अटक केली असून पोलीस या प्रकरणाचा पुढील तपास करत आहेत.