नागपूर: 'चौक पोलीसांचा असला तरी शहराचे कमिशनर आम्हीच' रीलबाजांची हिरोगिरी महागात;

नागपूर: सोशल मीडियावर प्रसिद्धी मिळवण्यासाठी पोलिसांचा अवमान करणारी रील बनवणे तीन तरुणांना चांगलेच महागात पडले. "चौक चाहे पुलीस की हो, शहर के कमिश्नर तो हम ही लोग है..." असा डायलॉग वापरत पोलिसांची खिल्ली उडवणारी रील सोशल मीडियावर व्हायरल झाल्यानंतर नागपूर पोलिसांनी तातडीने कारवाई करत तिघांना अटक केली.

मिळालेल्या माहितीनुसार, संबंधित तरुणांनी सार्वजनिक ठिकाणी रील शूट करत स्वतःला कायद्यापेक्षा वरचे असल्याचे दाखवण्याचा प्रयत्न केला होता. हा व्हिडिओ सोशल मीडियावर वेगाने व्हायरल झाला. त्यानंतर नागपूर पोलिसांनी या प्रकरणाची गंभीर दखल घेत संबंधितांची ओळख पटवून त्यांच्यावर गुन्हा दाखल केला.

पोलिसांनी तिघांना ताब्यात घेत चौकशी सुरू केली असून, सोशल मीडियाच्या माध्यमातून कायदा व सुव्यवस्थेला आव्हान देणाऱ्या किंवा पोलिसांचा अवमान करणाऱ्या कोणालाही सोडले जाणार नाही, असा स्पष्ट इशारा दिला आहे.

या कारवाईनंतर सोशल मीडियावर प्रसिद्धीसाठी धोकादायक किंवा कायद्याचा अवमान करणारे व्हिडिओ बनवणाऱ्यांमध्ये खळबळ उडाली असून, जबाबदारीने सोशल मीडियाचा वापर करण्याचे आवाहन पोलिसांकडून करण्यात आले आहे.