कल्याण हादरले: उड्डाणपुलाखाली आईच्या कुशीत झोपलेल्या ६ महिन्यांच्या चिमुरड्याचे अपहरण; परिसरात खळबळ

कल्याण पश्चिम रेल्वे स्थानक परिसरातील उड्डाणपुलाखाली रात्रीच्या वेळी झोपलेल्या एका महिलेच्या सहा महिन्यांच्या बाळाचे अज्ञात इसमाने अपहरण केल्याची धक्कादायक घटना समोर आली आहे. या घटनेमुळे कल्याण शहर आणि परिसरात मोठी खळबळ उडाली आहे. फिर्यादी रोशनी सूरज साहू (२१, रा. सिलवासा, दादरा आणि नगर हवेली) यांनी दिलेल्या तक्रारीनुसार, महात्मा फुले चौक (एमएफसी) पोलीस ठाण्यात गुन्हा दाखल करण्यात आला आहे.

नेमकी घटना: फिर्यादी रोशनी साहू काही कामानिमित्त गुजरातहून कल्याणात आल्या होत्या. सोमवारी रात्री ८ वाजण्याच्या सुमारास त्या कल्याण रेल्वे स्थानकाबाहेरील उड्डाणपुलाखाली आपल्या सहा महिन्यांच्या मुलासोबत विश्रांतीसाठी थांबल्या होत्या. रात्रीचा प्रवास आणि थकव्यामुळे त्यांना गाढ झोप लागली. याच संधीचा फायदा घेत अज्ञात अपहरणकर्त्याने त्यांच्या कुशीत झोपलेल्या बाळाला उचलले आणि तिथून पलायन केले. एवढेच नव्हे तर, आरोपीने जाताना मातेचा मोबाईल फोनदेखील चोरून नेला आहे.

पहाटे जाग येताच थरकाप: मंगळवारी पहाटे ३ वाजण्याच्या सुमारास रोशनी यांना जाग आली, तेव्हा त्यांना आपले बाळ आणि मोबाईल दोन्हीही जागेवर नसल्याचे दिसले. आपल्या चिमुरड्याला चोरीला गेल्याचे समजताच त्यांच्या पायाखालची जमीनच सरकली. त्यांनी आजूबाजूला बाळाचा शोधाशोध केला, पण बाळ मिळून आले नाही. त्यानंतर घाबरलेल्या अवस्थेत त्यांनी स्थानिक नागरिकांच्या मदतीने थेट महात्मा फुले चौक पोलीस ठाणे गाठले आणि आपबिती सांगितली.

पोलीस तपास आणि कारवाई: या घटनेचे गांभीर्य ओळखून पोलिसांनी भारतीय न्याय संहितेच्या (BNS) कलम १३७ (२) आणि ३०३ (२) अन्वये गुन्हा दाखल केला आहे. पोलीस उपनिरीक्षक विकास मडके या प्रकरणाचा अधिक तपास करत आहेत. आरोपीने महिलेचा मोबाईल चोरल्यामुळे तांत्रिक तपास करणे पोलिसांना सोपे जाणार आहे. रेल्वे स्थानक परिसरातील सीसीटीव्ही (CCTV) फुटेज तपासण्याचे काम सुरू असून, गुन्हे शाखा, लोहमार्ग पोलीस आणि एमएफसी पोलीस अशी चार पथके बाळाचा शोध घेण्यासाठी वेगवेगळ्या दिशेने रवाना झाली आहेत. आरोपी हा एकटा नसून त्याचे साथीदार असावेत, असा संशय पोलिसांकडून व्यक्त केला जात आहे.