पुण्यात पुन्हा गोळीबार! सहकारनगरमध्ये जिम मालक योगेश बनेकरवर ४ जणांचा जीवघेणा हल्ला; २ गोळ्या लागल्या, पोलिसांनी अवघ्या एका तासात आरोपींना बेड्या ठोकल्या!

पुणे: पुणे शहरातील गुन्हेगारीच्या घटनांमध्ये सातत्याने वाढ होत असतानाच आता सहकारनगर पोलीस ठाण्याच्या हद्दीत मंगळवारी रात्री दहा वाजण्याच्या सुमारास गोळीबाराची एक थरारक आणि खळबळजनक घटना घडली आहे. सहकारनगर परिसरातील प्रसिद्ध जिम मालक योगेश बनेकर यांच्यावर चार अज्ञात हल्लेखोरांनी पाळत ठेवून जीवघेणा हल्ला केला. या गोळीबारात योगेश बनेकर यांच्या शरीरात दोन गोळ्या लागल्या असून ते गंभीर जखमी झाले आहेत. सध्या त्यांच्यावर एका खासगी रुग्णालयात उपचार सुरू असून त्यांची प्रकृती स्थिर असल्याची माहिती पोलिसांनी दिली आहे.

पोलीस उपायुक्त मिलिंद मोहिते यांनी दिलेल्या माहितीनुसार, योगेश बनेकर हे नेहमीप्रमाणे आपल्या नियमित मार्गाने जात असताना दुचाकीवरून आलेल्या चार आरोपींनी अचानक त्यांच्यावर हल्ला चढवला. आरोपींनी हल्ला करण्यापूर्वी बनेकर यांची रेकी (पाळत) केल्याचा पोलिसांना संशय आहे. आरोपींकडे पिस्तूलासह धारदार शस्त्रे देखील होती. त्यांनी अचानक गाठून थेट गोळीबार केला. गोळीबाराच्या या आवाजाने सहकारनगर परिसरात एकच खळबळ आणि भीतीचे वातावरण पसरले. स्थानिक नागरिकांनी तातडीने धाव घेत जखमी बनेकर यांना जवळच्या रुग्णालयात दाखल केले.

घटनेची माहिती मिळताच सहकारनगर पोलिसांसह गुन्हे शाखेचे वरिष्ठ अधिकारी तातडीने घटनास्थळी दाखल झाले आणि त्यांनी संपूर्ण परिसराची नाकेबंदी केली. पोलिसांनी सीसीटीव्ही फुटेज, प्रत्यक्षदर्शींनी दिलेली माहिती आणि तांत्रिक तपासाच्या आधारे तातडीने चक्र फिरवली. गुन्ह्याचे गांभीर्य ओळखून पोलिसांनी अवघ्या एका तासाच्या आत अत्यंत वेगाने कारवाई करत या हल्ल्यात सामील असलेल्या चारही आरोपींना ताब्यात घेतले आहे. या आरोपींची ओळख पटली असून पोलीस हल्ल्यामागचे नेमके कारण, जुने वाद किंवा आर्थिक व्यवहार या सर्व बाजूंनी कसून चौकशी करत आहेत.