Pune : कोथरुडकरांसाठी आनंदाची बातमी! ‘मेट्रो लाईन 4 आणि 4A’चा आराखडा सादर; कोथरुड, वारजे, कर्वेनगरमध्ये उन्नत मार्गिका प्रस्तावित

Pune : कोथरुड, कर्वेनगर आणि वारजे परिसरातील नागरिकांसाठी महत्त्वाच्या ठरणाऱ्या मेट्रो लाईन 4 आणि 4ए प्रकल्पाचे सादरीकरण आज नागरिकांसमोर करण्यात आले. राज्याचे उच्च व तंत्रशिक्षण मंत्री चंद्रकांत पाटील यांनी यावेळी मेट्रो सेवा आता पुणेकरांच्या दैनंदिन जीवनाचा अविभाज्य भाग बनल्याचे सांगितले.

2016 मध्ये पुणे मेट्रो प्रकल्पाची सुरुवात झाली तेव्हा अनेकांच्या मनात शंका होती. मात्र, सध्या सुरू असलेल्या मार्गिका आणि नागरिकांकडून मिळणारा वाढता प्रतिसाद पाहता मेट्रोने शहराच्या वाहतूक व्यवस्थेत ठळक स्थान निर्माण केले आहे, असे पाटील यांनी नमूद केले. त्यांनी हिंजवडी मेट्रो मार्गिका लवकर सुरू होईल, अशी अपेक्षाही व्यक्त केली.

या कार्यक्रमात महाराष्ट्र मेट्रो रेल कॉर्पोरेशन लिमिटेडचे व्यवस्थापकीय संचालक श्रावण हर्डीकर यांनी मेट्रो प्रकल्पाची सद्यस्थिती आणि प्रस्तावित लाईन 4 व 4ए बाबत सविस्तर माहिती दिली. या नवीन मार्गिकेमुळे कर्वेनगर, वारजे आणि कोथरुड परिसरातील वाहतूक अधिक सुलभ होणार असून प्रवासाचा वेळ आणि खर्च दोन्ही कमी होण्यास मदत होणार आहे. पुढील चार वर्षांत हा प्रकल्प पूर्ण करण्याचे उद्दिष्ट मेट्रो प्रशासनाने ठेवले आहे. तसेच ‘लास्ट माईल कनेक्टिव्हिटी’साठी सुरू असलेल्या शटल बस आणि प्रीपेड रिक्षा सेवांचा नागरिकांना चांगला फायदा होत असल्याचेही त्यांनी सांगितले.

चंद्रकांत पाटील यांनी सादरीकरणाबद्दल समाधान व्यक्त करत मेट्रो प्रकल्पाच्या यशस्वी अंमलबजावणीसाठी पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या पाठबळाचा उल्लेख केला. हा प्रकल्प पूर्ण झाल्यानंतर कोथरुड परिसरातील वाहतूक कोंडी कमी होऊन नागरिकांचा वेळ आणि खर्च वाचेल, असा विश्वास त्यांनी व्यक्त केला.

कसा असेल मार्ग?
मेट्रो लाईन 4 खराडी ते खडकवासला दरम्यान धावणार असून ही पूर्णपणे उन्नत मार्गिका सुमारे 25.52 किमी लांबीची असेल. या मार्गावर एकूण 22 स्थानकांचा समावेश असेल. तर मेट्रो लाईन 4ए नळ स्टॉप, वारजे आणि माणिक बाग या भागांना जोडणार आहे. या दोन्ही मार्गिका मिळून एकूण लांबी सुमारे 31.636 किमी होणार असून 28 स्थानके असतील.

हा प्रकल्प पुढील चार वर्षांत पूर्ण करण्याचे उद्दिष्ट असून त्यामुळे सोलापूर मार्ग, कर्वे मार्ग, सिंहगड मार्ग तसेच मुंबई–बंगळुरू महामार्गावरील वाहतूक कोंडी कमी होण्यास मोठी मदत होणार आहे.