Pune : मैदानावरच अधुरं राहिलं पोलिस होण्याचं स्वप्न; पुण्यात भरती धाव चाचणीत २३ वर्षीय तरुणाचा मृत्यू, कुटुंबाचा आक्रोश

Pune : पोलीस होण्याचं स्वप्न उराशी बाळगून मैदानात उतरलेला एक तरुण धावताना अचानक कोसळला आणि काही क्षणांतच सगळं संपलं. शिवाजीनगर पोलीस मुख्यालयाच्या मैदानावर आज शनिवारी सकाळी अतिशय हृदयद्रावक आणि हळहळ व्यक्त करायला लावणारी घटना घडली. पुरुषोत्तम बारकुल (वय २३, रा. देऊळगाव राजा, जि. बुलढाणा) असं या मृत तरुणाचं नाव आहे.

नेमकी घटना काय?
पुणे शहरात गेल्या महिन्याभरापासून पोलीस भरतीची प्रक्रिया जोरात सुरू आहे. विविध टप्प्यांमधून उमेदवार जात असताना सध्या मैदानी चाचण्यांचा टप्पा सुरू आहे. शिवाजीनगरच्या पोलीस मुख्यालयाच्या मैदानावर कारागृह पोलीस भरतीसाठी उमेदवारांची चाचणी घेतली जात होती. आज शनिवारी सकाळी वातावरणही थोडं तणावपूर्ण होतं. सगळे उमेदवार आपापल्या परीने चांगली कामगिरी करण्यासाठी प्रयत्न करत होते. पुरुषोत्तमही त्याच जिद्दीने १६०० मीटर धावण्याच्या चाचणीत उतरला होता. ही चाचणी तशी कठीणच मानली जाते आणि अनेकांसाठी निर्णायकही ठरते. पुरुषोत्तमने दमदार सुरुवात करत एकामागून एक तीन फेऱ्या पूर्ण केल्या. मात्र, चौथ्या फेरीत धावत असताना अचानक त्याला अपस्माराचा झटका (फिट) आला. काही कळायच्या आत तो थेट मैदानावर कोसळला. हे पाहताच इतर उमेदवार घाबरले आणि त्यांनी तात्काळ अधिकाऱ्यांना आवाज दिला.

हृदयाचे ठोके मंदावले
घटनास्थळी उपस्थित असलेले अधिकारी आणि कर्मचारी लगेच धावून आले. मैदानावरच तैनात असलेल्या वैद्यकीय पथकाने त्याची प्राथमिक तपासणी केली. त्यावेळी त्याचे हृदयाचे ठोके मंदावल्याचं आढळलं, त्यामुळे परिस्थिती गंभीर असल्याचं स्पष्ट झालं. क्षणाचाही विलंब न लावता त्याला तातडीने ससून रुग्णालयात हलवण्यात आलं. मात्र डॉक्टरांनी तपासणी केल्यानंतर उपचार सुरू करण्यापूर्वीच त्याचा मृत्यू झाल्याचं जाहीर केलं. ही बातमी समजताच भरती प्रक्रियेत उपस्थित असलेल्या सर्वांवर शोककळा पसरली.

पुरुषोत्तम हा बुलढाणा जिल्ह्यातील देऊळगाव राजा येथील रहिवासी होता. पोलीस होण्याचं मोठं स्वप्न घेऊन तो या भरतीत सहभागी झाला होता आणि त्यासाठी त्याने मेहनतही घेतली होती. मात्र, नियतीने वेगळंच काहीतरी ठरवलं आणि त्याचं स्वप्न अपूर्णच राहिलं. या घटनेची माहिती त्याच्या कुटुंबीयांना देण्यात आली असून पुढील कायदेशीर प्रक्रिया सुरू आहे, अशी माहिती अपर पोलीस आयुक्त संजय पाटील यांनी दिली