Pune : महाशिवरात्रीच्या दिवशीच हरिश्चंद्रगड येथे दुर्घटना; कड्यावरचा दगड घरंगळून भाविकाच्या डोक्यावर कोसळला

Pune : राज्यभरात महाशिवरात्रीचा उत्साह बघायला मिळाला. राज्यातील प्रत्येक शहरात आणि गावामध्ये लाखो शिवभक्तांनी शिव मंदिरात जावून दर्शन घेतलं. सर्वत्र उत्साहाचं वातावरण बघायला मिळालं. पण या उत्साहाला हरिचंद्रगड येथे गालबोट बघायला मिळालं. कारण एक अप्रिय घटना हरिचंद्रगडावर घडली. हरिचंद्रगडावर भगवान शिवाचं दर्शन घेऊन खाली उतरत असताना भाविकावर काळाने घाला घातला. गडावरुन खाली उतरत असताना अचानक एक दगड निसटला आणि तो भाविकाचा डोक्यावर आदळला. यानंतर दगड भाविकाच्या पाठिवर कोसळला. या दुर्घटनेत भाविकाचा मृत्यू झाला.

सुरेश किसन दामसे असं मृतक भाविकाचं नाव आहे. ते 35 वर्षांचे होते. सुरेश हरिचंद्रगडावरुन दर्शन घेऊन खाली उतरत होते. पण याचवेळी कड्यावरचा सैल दगड अचावक खाली निसटला आणि त्यांच्या डोक्यावर आणि पाठिवर कोसळला. या दुर्घटनेत त्यांना गंभीर दुखापत झाली आणि ते जागेवरच बेशुद्ध झाले.

5 किमी पायी चालत भाविकाला उपचारासाठी नेलं, पण...
या घटनेनंतर इतर भाविकांनी आणि स्थानिक ग्रामस्थ तातडीने मदतीला धावले. हरिचंद्रगडावरुन खाली नेणं आणि वैद्यकीय मदतीसाठी घेऊन जाणं हे खूप कठीण कार्य होतं. मदतकार्य करणाऱ्या ग्रामस्त आणि भाविकांनी दुर्गम आणि कठीण पायवाट असल्यामुळे पाच किमी पायी चालत खिरेश्वर गावात सुरेश दामसे यांना जखमी अवस्थेत आणलं गेलं. तिथून त्यांना पुढील उपचारासाठी नेण्यात आलं. पण डॉक्टरांनी तपासल्यानंतर सुरेश यांचा मृत्यू झाल्याचं घोषित केलं.

सुरेश दामसे हे पुणे जिल्ह्याच्या आंबेगाव तालुक्यातील घोडेगावचे रहिवासी होते. या घटनेमुळे दामसे कुटुंबावर दु:खाचा डोंगर कोसळला आहे. या घटनेमुळे परिसरात मोठी खळबळ उडाली आहे. स्थानिक नागरिकांकडून या घटनेवर हळहळ व्यक्त केली जात आहे. अशाप्रकारे एखाद्या भाविकाचा मृत्यू कड्यावरील सैल दगड कोसळल्याने होत असेल तर प्रशासनाने काहीतरी उपाययोजना करावी, अशी मागणी आता जोर धरु लागली आहे. प्रशासन या घटनेची दखल घेऊन आगामी काळात खरंच काही कारवाई करतं का? हे पाहणं महत्त्वाचं आहे.