Pune : आकुर्डीतील महाविद्यालयात आरडीएक्स विस्फोटक ठेवल्याचा ई-मेल

आकुर्डी येथे डॉ. डी वाय पाटील संस्थेचे मोठे कॅम्पस आहे. या कॅम्पस मध्ये हजारो विद्यार्थी वेगवेगळ्या शाखांमध्ये शिक्षण घेत आहेत. मंगळवारी (११ मार्च) महाविद्यालयामध्ये परीक्षा सुरु असताना अचानक प्रशासनाला सकाळी नऊ वाजता एक मेल प्राप्त झाला. त्यामध्ये महाविद्यालय परिसरात आरडीएक्स नावाचे विस्फोटक पेरले असून त्याद्वारे महाविद्यालय उडवून देण्याची धमकी देण्यात आली होती.

महाविद्यालय प्रशासनाने दुपारी बारा वाजता पिंपरी-चिंचवड पोलिसांना मेलबाबत माहिती दिली. माहिती मिळताच रावेत पोलिसांनी तात्काळ घटनास्थळी धाव घेतली. अचानक पोलिसांचा मोठा ताफा महाविद्यालयात पोहोचल्याने विद्यार्थी आणि प्राध्यापकांमध्ये घबराट पसरली. पोलिसांनी तत्काळ संपूर्ण महाविद्यालय रिकामे करण्याचे आदेश दिले आणि सर्व विद्यार्थ्यांना बाहेर काढून तपासणी सुरू केली. परिसरात तपासणी सुरू असताना अफवांना उधाण आले. त्यामुळे पालकांनीही घाईघाईने महाविद्यालयाकडे धाव घेतली. दरम्यान बॉम्ब शोधक नाशक पथक, श्वान पथक, सायबर पोलीस आणि गुन्हे शाखेच्या पोलिसांना पाचारण करण्यात आले.

आयुक्तालयातील वरिष्ठ अधिकाऱ्यांनी घटनास्थळी भेट देऊन पाहणी केली. पोलिसांनी सुरुवातीला परीक्षा सुरु असलेल्या ठिकाणचा परिसर पिंजून काढला. तिथे कुठेही विस्फोटक आढळले नाही. त्यानंतर पोलिसांनी संपूर्ण महाविद्यालयात शोधमोहीम राबवली. विस्फोटक नसल्याची खात्री झाल्यानंतर या मेलबाबत तांत्रिक माहिती काढण्यास पोलिसांनी सुरुवात केली आहे. सायबर पोलिसांकडून मेल पाठवणाऱ्या व्यक्तीची ओळख पटवण्याचे काम सुरु आहे.

पोलिसांनी पालक आणि विद्यार्थ्यांना घाबरून न जाण्याचे आवाहन केले आहे. या प्रकरणात ज्या ई-मेल अकाऊंटवरून धमकी पाठवण्यात आली आहे, त्या अज्ञात व्यक्तीचा शोध घेण्यासाठी सायबर क्राइम सेलकडून तपास सुरू आहे. अशा खोट्या ई-मेल पाठवणाऱ्या व्यक्तीवर कठोर कारवाई करण्यात येईल, असेही पोलिसांकडून स्पष्ट करण्यात आले आहे.