Pune : पुणे शहरातील अनेक भाग अमली पदार्थांच्या विळख्यात; कोंढवा आणि येरवडा ठरले ‘हॉटस्पॉट’, पोलीस अलर्ट मोडवर!

Pune : शहर ‘ड्रग्जमुक्त’ करण्याचे प्रयत्न सुरू असतानाच पुण्यातील काही भाग अमली पदार्थांच्या विळख्यात अडकले असल्याचे स्पष्ट झाले आहे. पोलिसांच्या विश्लेषणात कोंढवा, येरवडा, खडकसह काही पोलिस ठाण्यांच्या हद्दीत ड्रग्ज प्रकरणे सर्वाधिक असल्याचे उघड झाल्याने आता या भागांवर विशेष लक्ष केंद्रित करण्यात येणार आहे.

पोलिस आयुक्त अमितेशकुमार आणि सह पोलिस आयुक्त रंजनकुमार शर्मा यांनी मंगळवारी गुन्हे आढावा बैठक घेतली. या वेळी पोलिस ठाण्यांच्या वरिष्ठ अधिकाऱ्यांना कठोर सूचना दिल्या आहेत. ‘केवळ कारवाई न करता अमली पदार्थाच्या साखळीचा मुळापर्यंत शोध घेण्याचे आदेश देण्यात आले आहेत. पोलिसांच्या विश्लेषणानुसार कोंढवा, लक्ष्मीनगर, येरवडा, काळेपडळ, खडक आणि लोणी काळभोर ही पोलिस ठाणे अमली पदार्थांच्या प्रकरणांत ‘टॉप’मध्ये आहेत. त्याचबरोबर शिवाजीनगर, डेक्कन, कोथरूड, वारजे, पर्वती, मार्केटयार्ड, बाणेर, लष्कर, मुंढवा, वानवडी, हडपसर, लोहगाव, वाघोली, खराडी, लोणीकंद, सहकारनगर या १७ पोलिस ठाण्यांच्या हद्दीतही मोठ्या प्रमाणावर अमली पदार्थांची प्रकरणे समोर येत आहेत,’ अशी माहिती पोलिस सह आयुक्त रंजनकुमार शर्मा यांनी दिली.

प्रत्येक संबंधित पोलिस ठाण्यात स्वतंत्र ‘अँटी-ड्रग्ज पथक’ स्थापन करण्यात येणार आहे. दोन अधिकारी आणि कर्मचाऱ्यांचा समावेश असलेले हे पथक ड्रग्जविरोधी कारवाईवर लक्ष ठेवणार आहे; तसेच या पथकांना अत्याधुनिक ‘ड्रग्ज ॲनालायझर’ यंत्रणा देण्यात येणार आहे. वरिष्ठ अधिकाऱ्यांनी स्पष्ट केले आहे, की केवळ साठा जप्त करण्यापुरते मर्यादित न राहता ड्रग्जचा पुरवठा कुठून होतो, कोणत्या मार्गाने येतो आणि कोणाला वितरित केला जातो, याचा सखोल तपास केला जाणार आहे. त्यासाठी शहरातील २२ पोलिस ठाण्यांच्या वरिष्ठ निरीक्षकांना विशेष जबाबदारी देण्यात आली आहे.

अमली पदार्थांची तस्करी अणि विक्री रोखण्यासाठी पोलिसांकडून आता ॲपचा (उपयोजन) वापर करण्यात येणार असून, या ॲपवर माहिती देणाऱ्या नागरिकांचे नाव गोपनीय ठेवण्यात येणार आहे. नगरसेवकांना ‘माझा प्रभाग ड्रग्ज मुक्त’ या उपक्रमाशी जोडण्यात आले आहे. पोलिस आयुक्त अमितेश कुमार यांनी प्रायोगिक तत्त्वावर पहिल्या टप्यात चार प्रभागांत हा उपक्रम सुरू करण्याचा निर्णय घेतला आहे.