Pune : साताऱ्यातील 27 वर्षीय तरुण अचानक बेपत्ता; 8 दिवसांनी पुण्यातील लॉजमध्ये मृतदेह आढळला, दुर्गंधीमुळे प्रकार उघड

Pune : साताऱ्यातील वाई येथून आठ दिवसांपूर्वी अचानक बेपत्ता झालेल्या एका 27 वर्षीय तरुणाचा पुण्यात मृतदेह आढळून आल्याने एकच खळबळ उडाली आहे. पुणे शहरातील गजबजलेल्या कॅम्प परिसरातील एका लॉजमध्ये या तरुणाने गळफास घेऊन आपली जीवनयात्रा संपवली. पीयूष ओसवाल (रा. वाई, जि. सातारा) असे या मृत तरुणाचे नाव असून, त्याच्या मृत्यूमुळे ओसवाल कुटुंबीयांवर दुखाचा डोंगर कोसळला आहे.

पुण्यातील लष्कर (कॅम्प) परिसरातील 'मुकेश लॉज'मध्ये ही खळबळजनक घटना उघडकीस आली. बुधवारी दुपारी लॉजमधील एका बंद खोलीतून अचानक उग्र आणि असह्य दुर्गंधी येऊ लागली. यामुळे लॉजवरील कर्मचारी आणि व्यवस्थापनाला संशय आला. कर्मचाऱ्यांनी संबंधित खोलीचा दरवाजा ठोठावला, आवाज दिला, परंतु आतून कोणताही प्रतिसाद मिळाला नाही. परिस्थितीचे गांभीर्य ओळखून लॉज प्रशासनाने तात्काळ बंडगार्डन पोलिसांना याची माहिती दिली.

Pune Railway : रेल्वे प्रवाशांसाठी मोठी बातमी; पुण्याकडे येणाऱ्या दोन गाड्या आजपासून हडपसरमध्येच थांबणार, लागू झाले नवे बदल

माहिती मिळताच बंडगार्डन पोलीस ठाण्याचे पथक तातडीने घटनास्थळी दाखल झाले. त्यांनी खोलीचा दरवाजा तोडून आत प्रवेश केला असता, समोरचे दृश्य अंगावर काटा आणणारे होते. पीयूष ओसवाल याने गळफास घेतलेल्या अवस्थेत आपले जीवन संपवले होते. पोलिसांनी दिलेल्या माहितीनुसार, मृतदेहाची अवस्था पाहता आणि खोलीत पसरलेली दुर्गंधी लक्षात घेता, पीयूषने सुमारे दोन ते तीन दिवसांपूर्वीच आत्महत्या केली असावी, असा प्राथमिक अंदाज वर्तवण्यात येत आहे.

मूळचा वाईचा असलेला पीयूष ओसवाल हा गेल्या आठ दिवसांपासून घरातून निघून गेला होता. तो घरी न परतल्याने आणि त्याचा कोणताही संपर्क न झाल्याने त्याच्या कुटुंबीयांनी वाई पोलीस ठाण्यात धाव घेतली होती. वाई पोलिसांनी तातडीने तो बेपत्ता असल्याची तक्रार नोंदवून तपास सुरू केला होता. एकीकडे वाई पोलीस आणि नातेवाईक त्याचा शोध घेत असतानाच, दुसरीकडे पुण्यात त्याचा मृतदेह आढळल्याने या प्रकरणाला धक्कादायक वळण मिळाले आहे.

घटनास्थळाचा पंचनामा केल्यानंतर बंडगार्डन पोलिसांनी मृतदेह उत्तरीय तपासणीसाठी ससून रुग्णालयात पाठवला आहे. पीयूष पुण्यात कधी आला? तो या लॉजवर कधीपासून थांबला होता? आणि त्याने आत्महत्येसारखे टोकाचे पाऊल का उचलले? या प्रश्नांची उत्तरे अद्याप मिळालेली नाहीत.

याप्रकरणी बंडगार्डन पोलीस ठाण्यात अकस्मात मृत्यूची नोंद करण्याची प्रक्रिया रात्री उशिरापर्यंत सुरू होती. वाई पोलिसांनाही या घटनेची माहिती देण्यात आली असून, दोन्ही पोलीस ठाण्यांच्या समन्वयातून पुढील तपास केला जात आहे. तरुण वयात पीयूषने उचललेल्या या टोकाच्या पाऊलामुळे वाई परिसरात हळहळ व्यक्त होत आहे.