Pune : दिवसाढवळ्या धाडसी दरोडा! तरुणांनी कोयता दाखवून सराफाकडून ५२ लाखांचे दागिने लुटले, नंतर काय घडले?

Pune : भरदिवसा सराफी पेढीवर दरोडा घालून ५२ लाख रुपयांचे दागिने लुटणाऱ्या टोळीला गुन्हे शाखेने अवघ्या काही दिवसांत अटक केली. या कारवाईत तीन आरोपींना अटक करण्यात आली असून, त्यांच्या तीन अल्पवयीन साथीदारांना ताब्यात घेण्यात आले आहे. चोरट्यांकडून २२४ ग्रॅम सोन्याचे व १८३ ग्रॅम चांदीचे दागिने जप्त करण्यात आले आहेत.

प्रवीण महादेव शिंदे (वय १८, रा. फुरसुंगी, हडपसर), राजदीप संतोष जगताप (वय २१, रा. लोणी काळभोर) आणि भावेश राजेश चव्हाण (वय २०, रा. रवीदर्शन, उन्नतीनगर, हडपसर) अशी अटक केलेल्या आरोपींची नावे आहेत. याच गुन्ह्यात तीन अल्पवयीन मुलांना ताब्यात घेण्यात आले आहे. पुणे-सोलापूर महामार्गावरील शेवाळवाडी परिसरात एका सराफी पेढीत शनिवारी (तीन जानेवारी) सायंकाळी साडेपाचच्या सुमारास हा दरोडा पडला होता. आरोपी शिंदे, जगताप, चव्हाण आणि त्यांचे अल्पवयीन साथीदार यांनी आधी परिसराची पाहणी केली होती. त्या वेळी सराफी पेढीत सराफ व्यावसायिक एकटेच होते.

Pune : ठाकरेंना पुण्यात धक्का, कोथरुडमध्ये 'मशाल' विझली, अधिकृत उमेदवारांचा भाजप प्रवेश; राजकारणात गोंधळ कायम

आरोपींनी कोयत्याचा धाक दाखवून सुमारे ५२ लाख रुपयांचे दागिने लुटून पलायन केले. घटनेची माहिती मिळताच मांजरी पोलिसांनी तातडीने घटनास्थळी भेट देऊन तपास सुरू केला. या प्रकरणी मांजरी पोलिसांनी गुन्हा दाखल केला. गुन्ह्याची गंभीरता लक्षात घेता गुन्हे शाखेच्या दरोडा व वाहन चोरी विरोधी पथकासह युनिट दोन, युनिट पाच आणि युनिट सहा यांनी समांतर तपास सुरू केला.

सराफी पेढीतील सीसीटीव्ही चित्रीकरण व तांत्रिक तपासाच्या आधारे आरोपी छत्रपती संभाजीनगर येथे पसार झाल्याची माहिती पोलिसांना मिळाली. तेथून दोन अल्पवयीनांसह आरोपींसह राजदीप जगताप याला ताब्यात घेण्यात आले. उर्वरित आरोपींना पुणे-सोलापूर रस्त्यावरील द्राक्ष संशोधन केंद्र परिसरात सापळा रचून अटक करण्यात आली.

दरम्यान, ही कारवाई गुन्हे शाखेचे उपायुक्त निखिल पिंगळे यांच्या मार्गदर्शनाखाली करण्यात आली. पोलिस उपनिरीक्षक एस. जे. तानवडे, अभिजित पवार, राजेश लोखंडे, राजू पुणेकर, कानिफनाथ कारखेले, ऋषीकेश ताकवणे आणि ऋषीकेश व्यवहारे यांच्या पथकाने ही कामगिरी केली.