​Pune : पुण्यातून मोठी बातमी: लेक्चर अटेंड करत असतानाच मिळालं आमदारकीचं तिकीट! २२ वर्षीय सई पवार राज्याच्या राजकारणात सर्वात तरुण चेहरा.

Pune :  पुणे महानगरपालिकेच्या निवडणुकीत यंदा एका 'यंग फेस'ची मोठी चर्चा सुरू झाली आहे. अवघ्या 22 वर्षांच्या सई थोपटे हिला भारतीय जनता पक्षाने प्रभाग क्रमांक 36 (क) मधून निवडणुकीच्या मैदानात उतरवले आहे. विशेष म्हणजे, सई ही या निवडणुकीतील राज्यातील सर्वात तरुण उमेदवार म्हणून समोर आली आहे.

सई सध्या सिम्बायोसिस महाविद्यालयात बी. बी. ए. च्या शेवटच्या वर्षात शिकत आहे. कॉलेजमध्ये लेक्चर सुरू असतानाच तिला पक्षाचा उमेदवारीबाबतचा फोन आला आणि ती थेट प्रभागात पोहचली. तिची ही शैक्षणिक कारकीर्द आता राजकीय वळणावर येऊन ठेपली आहे. उमेदवारीची बातमी समजताच कॉलेजमधील तिच्या मित्र - मैत्रिणींनी एकच जल्लोष केला. एका सामान्य विद्यार्थिनीपासून थेट पुणे महापालिकेची उमेदवार बनण्यापर्यंतचा हा प्रवास तिच्यासाठी स्वप्नवत ठरला आहे.

सईचे नेतृत्व हे विद्यार्थी चळवळीतून घडले आहे. अखिल भारतीय विद्यार्थी परिषदेत (ABVP) सक्रिय असताना तिने विद्यार्थ्यांचे प्रश्न, शैक्षणिक समस्या आणि सामाजिक विषयांवर अनेक आंदोलनं केली आहेत. ग्राऊंड लेव्हलवर काम करण्याचा अनुभव आणि तरुणांशी जोडलेली नाळ, यामुळेच पक्षाने तिच्या नावावर शिक्कामोर्तब केले आहे.

Pune : दिवसाढवळ्या धाडसी दरोडा! तरुणांनी कोयता दाखवून सराफाकडून ५२ लाखांचे दागिने लुटले, नंतर काय घडले?

सईला राजकारणाचे बाळकडू घरातूनच मिळाले आहे. तिचे वडील प्रशांत थोपटे हे भाजपचे जुने आणि निष्ठावान कार्यकर्ते आहेत. त्यांनी पर्वती मतदारसंघात संघटनेची अनेक पदे भूषवली आहेत. त्यांच्या अनेक वर्षांच्या पक्षनिष्ठेची दखल घेत आणि आमदार माधुरी मिसाळ यांच्या पाठबळामुळे सईला ही मोठी संधी मिळाली असल्याचे बोलले जात आहे.

सहसा घराणेशाही किंवा ज्येष्ठ नेत्यांना झुकते माप दिले जाते. मात्र, भाजपने एका तरुण विद्यार्थिनीला संधी देऊन 'युवा नेतृत्वा'चा नारा प्रत्यक्षात आणला आहे. सईची संवाद साधण्याची शैली आणि आक्रमक पण संयमी स्वभाव तिच्या जमेच्या बाजू मानल्या जात आहेत. आता या निवडणुकीत पुण्यातील मतदार या सर्वात तरुण उमेदवाराला कौल देऊन महापालिकेत पाठवतात का, हे पाहणे औत्सुक्याचे ठरेल.