Pune : पुण्यात मसाज पार्लरवर पोलिसांची धाड; इमारतीतून उडी मारल्याने महिलेचा मृत्यू, पतीच्या मागणीनंतर CID चौकशी सुरू

Pune : विमाननगर येथील मसाज पार्लरमधील महिलेच्या मृत्यू प्रकरणात राज्य गुन्हे अन्वेषण विभागाकडून (सीआयडी) चौकशी करण्यात येणार आहे. पोलिसांच्या कारवाईवेळी महिलेने इमारतीतून उडी मारली होती. या घटनेत तिचा मृत्यू झाला होता. या प्रकरणात महिलेच्या पतीने पोलिस आयुक्त अमितेशकुमार यांची भेट घेऊन त्यांच्याकडे तक्रार दिली. या प्रकरणाची चौकशी करण्याची मागणी पतीने केली आहे.

काय आहे प्रकरण?
पुणे येथील विमाननगर भागातील एका मसाज पार्लरमध्ये देह व्यापाराचा व्यवसाय सुरू असल्याची माहिती मिळाल्यानंतर विमानतळ पोलिसांच्या पथकाने तेथे छापा टाकला. पोलिसांची कारवाई, तसेच अटकेची भीती वाटल्याने महिलेसह मसाज पार्लरच्या व्यवस्थापकाने इमारतीच्या दुसऱ्या मजल्यावरून उडी मारली. या घटनेत महिला गंभीर जखमी झाली. मसाज पार्लरमधील व्यवस्थापकाच्या पायाला दुखापत झाली होती.

दरम्यान, या घटनेनंतर सीआयडीच्या पथकाने मंगळवारी विमाननगर भागातील इमारतीस भेट दिली. सीआयडीच्या पथकाकडून या प्रकरणात चौकशी करण्यात येणार आहे. संबंधितांचे जबाब नोंदविण्यात येणार आहेत.

नेमकं काय झालं होतं?
विमानगर परिसरातील ‘द रुट्स स्पा’ येथे पोलिसांची कारवाई सुरु असताना महिला कर्मचारी आणि स्पा सेंटरच्या व्यवस्थापकाने इमारतीच्या दुसऱ्या मजल्यावरून उडी मारली होती. विमानतळ पोलिस ठाण्याच्या पथकाने रविवारी दुपारी तीन वाजताच्या सुमारास स्पा सेंटरवर छापा टाकला होता. कारवाईदरम्यान अटकेच्या भीतीने महिला आणि व्यवस्थापकाने खिडकीतून उडी मारल्याचे पोलिसांनी सांगितले होते.

महिलेला तातडीने रुग्णालयात दाखल करण्यात आले, मात्र उपचारांपूर्वीच तिचा मृत्यू झाला होता, तर व्यवस्थापकाच्या पायाला गंभीर दुखापत झाली असून त्याच्यावर उपचार सुरु आहेत. पोलिसांनी तात्काळ पंचनामा करत स्पा सेंटरचा कारभार, परवाने, कर्मचारी नोंदी; तसेच अन्य बाबींची तपासणी सुरु केलेली.

स्पा सेंटरमध्ये सुरू असलेल्या प्रकारांबाबत तक्रारी मिळाल्यानंतर ही कारवाई करण्यात आली होती. या प्रकरणी विमानतळ पोलिस ठाण्यात गुन्हा दाखल करत आला होता. घटनेबाबत स्पा सेंटरचे व्यवस्थापन, कर्मचारी आणि अन्य संबंधित व्यक्तींची चौकशी करण्यात आली आहे.