विद्यार्थ्यांवर सक्ती नको; शिक्षण विभागाचे शाळांना कडक निर्देश

 

 

पुणे : राज्यातील सर्व माध्यमांच्या आणि सर्व व्यवस्थापनांच्या शाळांनी विद्यार्थ्यांना गणवेश, पुस्तके तसेच इतर शैक्षणिक साहित्य विशिष्ट दुकानातून किंवा शाळेतूनच खरेदी करण्याची सक्ती करू नये, असे स्पष्ट आणि कडक निर्देश शिक्षण संचालनालयाने दिले आहेत.

शासनाच्या ११ जून २००४ च्या निर्णयाची काटेकोर अंमलबजावणी करण्याचे आदेश प्राथमिक शिक्षण संचालक शरद गोसावी तसेच माध्यमिक व उच्च माध्यमिक शिक्षण संचालक डॉ. महेश पालकर यांनी दिले आहेत.अनेक ठिकाणी शाळांकडून पालकांना ठरावीक दुकानातूनच साहित्य खरेदी करण्यासाठी दबाव टाकला जात असल्याच्या तक्रारी प्राप्त झाल्यानंतर शिक्षण विभागाने ही भूमिका घेतली आहे. अशा प्रकारे सक्ती केल्यास पालकांवर आर्थिक ताण वाढतो, तसेच स्पर्धात्मक दरांचा फायदा त्यांना मिळत नाही, असेही विभागाने स्पष्ट केले आहे.

दरम्यान, या नियमांचे उल्लंघन करणाऱ्या शाळांवर कडक कारवाई करण्यात येणार असल्याचा इशारा शिक्षण विभागाने दिला आहे. संबंधित अधिकाऱ्यांना या बाबत लक्ष ठेवण्याच्या सूचना देण्यात आल्या आहेत.
पालकांना त्यांच्या पसंतीनुसार आणि सोयीप्रमाणे शैक्षणिक साहित्य खरेदी करण्याचा अधिकार असल्याचेही शिक्षण विभागाने अधोरेखित केले आहे.