Modi Pune Tour Cancelled : पंतप्रधान नरेंद्र मोदींचा पुणे दौरा रद्द, मुसळधार पावसाच्या शक्यतेमुळे मोठा निर्णय

Pune  : राज्यातील विधानसभा निवडणूक तोंडावर आलेली असताना, आज (गुरुवारी) पंतप्रधान नरेंद्र मोदी पुणे दौऱ्यावर येणार होते. मात्र मुसळधार पावसाच्या शक्यतेमुळे मोदींचा पुणे दौरा रद्द करण्यात आला आहे. मोदींचा पुणे दौरा तात्पुरता रद्द करण्यात आला असून त्याची नवीन तारीख लवकरच जाहीर होण्याची शक्यता आहे.

मोदींचा दौरा पुढे ढकलला

आज सायंकाळी त्यांची स. प. महाविद्यालयाच्या मैदानावर जाहीर सभा होणार होती. परंतु, या सभेवर जोरदार पावसाचे सावट आहे. मागील दोन दिवसांतील पावसाने या मैदानावर व सभा मंडपातही पाणी साचले आहे. त्याचा निचरा करून मैदान कोरडे करण्यासाठी प्रशासन प्रयत्नांची शर्थ करत आहे. सभेला गर्दी व्हावी, यासाठी भारतीय जनता पक्षासह महायुतीचे प्रयत्न सुरू आहेत. अशातच मोदींचा दौरा रद्द करण्याचे वृत्त समोर आले.

पंतप्रधान मोदी यांच्या हस्ते मेट्रो प्रकल्पाच्या जिल्हा न्यायालय ते स्वारगेट या भूमिगत मार्गाचे उद्घाटन आणि स्वारगेट ते कात्रज या मार्गाचे भूमिपूजन होणार होते. यासह एकूण बारा प्रकल्पांचे उद्घाटन व भूमिपूजन मोदींच्या हस्ते होणार होते. यानिमित्ताने स. प. महाविद्यालयाच्या मैदानावर पंतप्रधान मोदी यांची सभा होणार होती. परंतु आता ती पुढे ढकलली जाणार आहे.

Manoj Jarange : मनोज जरांगेंचं उपोषण स्थगित, “ज्यांनी ज्यांनी त्रास दिला त्यांना…”

मोठ्या प्रमाणावर चिखल आणि दलदल

गेल्या दोन-तीन दिवसांत झालेल्या जोरदार पावसाने मैदानावर मोठ्या प्रमाणावर चिखल आणि दलदल झाली आहे. त्यामुळे यावर खडी पसरविण्यासाठी प्रशासनाची धावपळ सुरू होती. मैदानावर काही ठिकाणी प्लायवूड टाकण्यात आले आहे. महापालिका आयुक्त डॉ. राजेंद्र भोसले यांच्यासह वरिष्ठ अधिकाऱ्यांनी स. प. महाविद्यालय येथे ठाण मांडले आहे. याशिवाय जिल्हाधिकारी, विभागीय आयुक्त, उपमुख्यमंत्री अजित पवार यांनीही स. प. महाविद्यालयाची पाहाणी करून सूचना केल्या होत्या.

प्रशासनातील वरिष्ठ अधिकारी, केंद्र सरकारचे प्रतिनिधी, पंतप्रधानांच्या सुरक्षा पथकातील अधिकाऱ्यांनी मैदानाची पाहाणी करून आढावा घेतला. त्यात हवामानासह विविध बाबींवर चर्चा झाली. त्यानुसार पंतप्रधानांचा दौरा पुढे ढकलण्यात आली आहे.