शेगाव हादरलं! महिला कर्मचाऱ्यांचे गुप्त व्हिडिओ काढून ब्लॅकमेल; हॉटेल मालक अटकेत

शेगाव शहरातून एक अत्यंत धक्कादायक आणि संतापजनक प्रकार समोर आला आहे. खामगाव मार्गावरील एका नामांकित हॉटेलच्या मालकाने आपल्या हॉटेलमध्ये काम करणाऱ्या महिला कर्मचाऱ्यांचे गुप्तपणे अंघोळ करतानाचे फोटो आणि व्हिडिओ काढल्याचा आरोप आहे. हे व्हिडिओ सोशल मीडियावर व्हायरल करण्याची धमकी देत संबंधित महिलेला वारंवार ब्लॅकमेल करण्यात आले.

तक्रारीनुसार, आरोपी हॉटेल मालक ज्ञानेश्वर लिप्ते याने पीडित महिलेचे खासगी व्हिडिओ चोरून रेकॉर्ड केले आणि ते सार्वजनिक करण्याची धमकी देत तिचे लैंगिक शोषण केले. महिलेला जातीवाचक शिवीगाळ करून मानसिक छळही करण्यात आल्याचा आरोप आहे.

भीतीमुळे काही काळ महिला गप्प राहिली. मात्र, सततच्या त्रासाला कंटाळून तिने शेवटी शेगाव पोलिस ठाण्यात धाव घेत तक्रार दाखल केली. पोलिसांनी तत्काळ कारवाई करत आरोपीविरोधात लैंगिक अत्याचार, विनयभंग आणि अॅट्रॉसिटी कायद्यांतर्गत गंभीर गुन्हे दाखल केले आहेत. आरोपीला अटक करण्यात आली असून त्याची सध्या चौकशी सुरू आहे.

या घटनेमुळे संपूर्ण बुलढाणा जिल्ह्यात संतापाची लाट उसळली आहे. कामाच्या ठिकाणी महिलांच्या सुरक्षेचा प्रश्न पुन्हा ऐरणीवर आला असून आरोपीला कठोर शिक्षा व्हावी, अशी मागणी नागरिकांकडून होत आहे. पोलिस आरोपीच्या मोबाईल आणि इलेक्ट्रॉनिक उपकरणांची तपासणी करत असून आणखी महिलांचे व्हिडिओ सापडतात का, याचा तपास सुरू आहे.