पुणे: एनआयबीएम ॲनेक्समधील ७ हजारांहून अधिक कुटुंबांना हक्काच्या उद्यानाची प्रतीक्षा; मोकळ्या जागेवर गार्डन व वॉकिंग ट्रॅकची जोरदार मागणी

पुणे: मोहम्मदवाडी येथील एनआयबीएम ॲनेक्स परिसरातील सात हजारांहून अधिक कुटुंबांनी परिसरातील मोकळ्या जागेवर सार्वजनिक उद्यान आणि चालण्यासाठी मार्ग, व्यायाम व जॉगिंग करता यावे, यासाठी स्वतंत्र मार्गिका उभारण्यात यावी, अशी मागणी पुणे महापालिका प्रशासनाकडे करण्यात आली आहे.

एनआयबीएम ॲनेक्स परिसरात गेल्या काही वर्षांत मोठ्या प्रमाणावर गृहसंकुले उभी राहिली आहेत. मात्र, या वाढत्या लोकसंख्येच्या तुलनेत सार्वजनिक उद्याने, खेळाची मैदाने आणि नागरिकांसाठी खुल्या जागा पुरेशा प्रमाणात उपलब्ध नसल्याचे रहिवाशांचे म्हणणे आहे.परिसरातील एलिना लिव्हिंग सोसायटी, रहेजा स्टर्लिंग, मॅपल टॉवर, ओरिएंट हिल व्ह्यू यांसह विविध सोसायट्यांमधील रहिवाशांनी या मागणीसाठी पुढाकार घेतला आहे. नागरिकांनी १७ सप्टेंबर रोजी पुणे महापालिका आयुक्तांकडे निवेदन देऊन एलिना लिव्हिंग सोसायटीसमोरील मोकळ्या जागेचा सार्वजनिक उपयोगासाठी विकास करण्याची मागणी केली होती.

संबंधित जागा पुणे महानगर परिवहन महामंडळासाठी राखीव असल्याचे रहिवाशांनी नमूद केले आहे. मात्र, सध्या जागेचा पूर्ण क्षमतेने वापर होत नसल्याने नागरिकांच्या गरजा लक्षात घेऊन तिचा सार्वजनिक उपयोगासाठी विकास करण्यात यावा, अशी मागणी आहे.

उद्यान, चालण्याचा मार्ग, जॉगिंग ट्रॅक आणि आवश्यक मूलभूत सुविधा उभारल्यास परिसरातील सात हजारांहून अधिक कुटुंबांना त्याचा थेट फायदा होईल. त्याचबरोबर मोकळ्या जागेवरील कचरा आणि अस्वच्छतेची समस्याही दूर होण्यास मदत होईल, असा रहिवाशांचा दावा आहे.

एनआयबीएम ॲनेक्स परिसरातील नागरिकांनी आता महापालिका प्रशासनाने या मागणीचा गांभीर्याने विचार करून उपलब्ध जागेचा विकास आराखडा तयार करावा, अशी अपेक्षा व्यक्त केली आहे. सार्वजनिक उद्यान आणि चालण्याचा मार्ग उपलब्ध झाल्यास नागरिकांच्या आरोग्यासोबतच परिसरातील पर्यावरण आणि सुरक्षिततेतही सुधारणा होईल, असे रहिवाशांचे म्हणणे आहे.