पुणे: कुख्यात गुंड सचिन घायवळला राजस्थानमध्ये बेड्या; ९ महिन्यांपासून होता फरार

पुणे: शहर पोलिसांच्या गुन्हे शाखेने एक मोठी कारवाई करत, गेल्या नऊ महिन्यांपासून फरार असलेल्या कुख्यात गुंड सचिन बन्सीलाल घायवळ (वय ४८) याला राजस्थानमधून अटक केली आहे. सचिन हा पुण्यातील कुख्यात गुंड निलेश घायवळचा सख्खा मोठा भाऊ आहे.

काय आहे प्रकरण? गेल्या वर्षी १७ सप्टेंबर रोजी कोथरूड भागात झालेल्या गोळीबार प्रकरणानंतर सचिन घायवळवर महाराष्ट्र संघटित गुन्हेगारी नियंत्रण कायद्यांतर्गत (मोक्का) कारवाई करण्यात आली होती. या कारवाईची चाहूल लागताच तो पुण्यातून पसार झाला. पोलिसांपासून वाचण्यासाठी त्याने वारंवार आपली ठिकाणे बदलली. सुरुवातीला तो सोलापूरमध्ये काही काळ लपून राहिला आणि त्यानंतर जयपूरमार्गे राजस्थानमधील सीकर जिल्ह्यातील धिंगपूर गावात जाऊन स्थायिक झाला.

पोलिसांनी कसा लावला माग?सचिन घायवळ हा मूळचा व्यवसायाने शिक्षक असून एका नामांकित शाळेत कार्यरत होता. पोलिसांची नजर चुकवण्यासाठी त्याने आपली वेशभूषा बदलली होती आणि दाढी वाढवली होती.
तो अत्यंत सावधगिरी बाळगत होता; त्याने ऑनलाईन आर्थिक व्यवहार पूर्णपणे टाळले होते आणि केवळ रोख रकमेचा वापर करत होता. राहण्यासाठी त्याने ६,५०० रुपये मासिक भाड्याचे घर घेतले होते आणि बाहेरचे जेवण टाळून तो मंदिरातील प्रसादावर गुजराण करत होता. तथापि, पुणे गुन्हे शाखेच्या युनिट-३ च्या पथकाने तांत्रिक तपास आणि गोपनीय माहितीच्या आधारे त्याचा माग काढला आणि राजस्थानमध्ये सापळा रचून बुधवारी रात्री त्याला ताब्यात घेतले.

अटकेच्या वेळी त्याच्याकडे ३.५० लाख रुपये रोख रक्कम सापडली. गुन्हेगारी इतिहास:सचिन घायवळवर कोथरूड आणि वारजे पोलीस ठाण्यांमध्ये खून, खंडणी, खुनाचे प्रयत्न, अपहरण, जीवे मारण्याची धमकी आणि बेकायदेशीर शस्त्रास्त्रे बाळगणे अशा गंभीर स्वरूपाचे एकूण ११ गुन्हे दाखल आहेत. कोथरूड परिसरातील १० फ्लॅट बळकावल्याचाही त्याच्यावर गंभीर आरोप आहे. सध्या त्याला ९ जूनपर्यंत पोलीस कोठडी सुनावण्यात आली असून, त्याच्या टोळीतील इतर सदस्यांचा आणि त्याला मदत करणाऱ्यांचा पोलीस शोध घेत आहेत.