Nashik : प्रजासत्ताक दिनी गालबोट! परेड सुरू असतानाच फुगे विक्रेत्याच्या सिलिंडरचा स्फोट; ५ जण जखमी

Nashik : राज्यासह देशभरात ७७ वा प्रजासत्ताक दिन उत्साहात साजरा होत आहे. पण नाशिक जिल्ह्यातील मालेगावात प्रजासत्ताक दिनाच्या आनंदाला गालबोट लागलं आहे. पोलीस परेड मैदानापासून अवघ्या २५० मीटरवर फुगे विक्रेत्याच्या नायट्रोजन गॅस सिलिंडरचा अचानक स्फोट झाला. त्यात ५ जण गंभीर जखमी झाले आहेत. जखमींना रुग्णालयात दाखल करण्यात आलं आहे. तिथे त्यांच्यावर उपचार सुरु आहेत. पोलीस आणि प्रशासनानं घटनास्थळी पोहोचून तपास सुरु केला आहे.

पोलीस परेड मैदानापासून हाकेच्या अंतरावर फुगे विक्रेता उभा होता. त्याच्याकडे असलेल्या नायट्रोजन सिलिंडरचा अचानक स्फोट झाला. त्यात ५ जण गंभीर जखमी झाले आहेत. जखमींपैकी दोघांना उपचारांसाठी नाशिकला पाठवण्यात आलं आहे. जखमींमध्ये दोन लहान मुलं, दोन महिला आणि एका पुरुषाचा समावेश आहे. यातील दोघांची प्रकृती गंभीर आहे.

Nashik : प्रजासत्ताक दिनी गोंधळ! वन कर्मचाऱ्याचा मंत्री महाजनांना सवाल, ‘बाबासाहेबांचं नाव का घेतलं नाही?’

प्रजासत्ताक दिनाच्या निमित्तानं फुगे घेण्यासाठी काही जण विक्रेत्याजवळ थांबले होते. त्याचवेळी सिलिंडरचा स्फोट झाला. या स्फोटात विनोद थोरात, मोहित जाधव, अतुल शेवाळे, प्रमिला यादव, उज्ज्वला महाजन जखमी झाले. सकाळी पोलीस परेड मैदानात राष्ट्रीय ध्वजाला सलामी देण्याचा कार्यक्रम सुरु होता. या सोहळ्याला अतिरिक्त जिल्हाधिकारी, वरिष्ठ पोलीस अधिकारी, शाळकरी विद्यार्थी आणि स्थानिक नागरिक हजर होते. त्याच सुमारास मैदानाजवळ एक फुगेवाला नायट्रोजन गॅसचे फुगे फुगवून विकत होता. प्रजासत्ताक दिन साजरा करण्यासाठी बाहेर पडलेली मुलं आणि कुटुंब विक्रेत्याकडून फुगे विकत होतं. त्याच सुमारास स्फोट झाला.

स्फोटाची तीव्रता जास्त होती. स्फोटाचा आवाज दूरवर ऐकू गेला आणि परिसरात खळबळ उडाली. दहशतवाद्यांनी स्फोट घडवून आणल्याची चर्चा सुरु झाली. तशा अफवा पसरल्या. पोलिसांनी दिलेल्या माहितीनुसार, स्फोटात पाच जण जखमी झाले आहेत. त्यांना एका खासगी रुग्णालयात दाखल करण्यात आलं आहे. यातील दोघांची प्रकृती चिंताजनक आहे. त्यांना उपचारांसाठी नाशिकला हलवण्यात आलं आहे.

फुगे फुगवण्यासाठी वापरण्यात येणाऱ्या नायट्रोजन गॅस सिलिंडरमध्ये तांत्रिक बिघाड झाल्यामुळे किंवा अतिरिक्त दबावामुळे स्फोट झाला असावा, अशी शक्यता पोलिसांनी प्राथमिक तपासानंतर वर्तवली. या प्रकरणी पोलिसांनी कसून तपास सुरु केला आहे.