नाशिक: आईच्या बचावासाठी गेलेल्या ७ वर्षांच्या चिमुकल्याचाही जीव घेतला; बापाने पत्नी व मुलाला संपवून स्वतःही घेतलं विष

नाशिक: एक अत्यंत सुन्न करणारी आणि मन हेलावून टाकणारी घटना समोर आली आहे. नाशिकरोड परिसरातील जेलरोड भागातील महारुद्र कॉलनीतील वसंत विहार येथील अरिंगळे चाळीत एका पतीने आपल्याच पत्नीची आणि अवघ्या ७ वर्षांच्या पोटच्या मुलाची धारदार चाकुने गळा चिरून अत्यंत निर्घृणपणे हत्या केली. या भीषण हत्याकांडानंतर संशयित पतीने स्वतःही विषारी औषध प्राशन करून आत्महत्या करण्याचा प्रयत्न केला असून, रुग्णालयात त्याची मृत्यूशी झुंज सुरू आहे. या घटनेमुळे संपूर्ण नाशिक शहर हादरले आहे.

नेमकी घटना काय?
अश्विनी किरण हजारे (वय ४३) आणि सुयंश किरण हजारे (वय ७) असे या दुर्दैवी घटनेत प्राण गमावलेल्या मायलेकाची नावे आहेत, तर संशयित पती किरण एकनाथ हजारे (वय ५४) असे त्याचे नाव असून त्याच्यावर सध्या जिल्हा शासकीय रुग्णालयात अतिदक्षता विभागात उपचार सुरू आहेत. मिळालेल्या माहितीनुसार, किरण आणि अश्विनी हे गेल्या सात महिन्यांपासून या भागात वास्तव्यास होते. रविवारी रात्री हे कुटुंब सासुरवाडीला जेवणासाठी गेले होते आणि तिथून रात्री उशिरा परतल्यानंतर तिघेही आपापल्या खोलीत झोपले होते.

सोमवारी पहाटेच्या सुमारास किरणने अचानक पत्नी अश्विनीवर धारदार चाकूने हल्ला चढवला. आपल्या आईवर वडील वार करत असल्याचे पाहून भेदरलेला अवघ्या ७ वर्षांचा चिमुकला सुयंश आईच्या बचावासाठी मध्ये धावला. मात्र, संतापलेल्या आणि निर्दयी बनलेल्या नराधम बापाने सुयंशच्या गळ्यावरही चाकू फिरवला. या भयानक हल्ल्यात आई आणि मुलगा दोघांचाही जागीच मृत्यू झाला.

दरवाजा उघडल्याने उघडकीस आला प्रकार
सोमवारी सकाळी किरण हजारे यांच्या घराचा दरवाजा उघडाच असल्याने शेजाऱ्यांच्या संशय आला. त्यांनी आत जाऊन पाहिले असता अश्विनी आणि सुयंश रक्ताच्या थारोळ्यात मृतावस्थेत पडलेले आढळले, तर किरण हजारे हा विषारी औषध सेवन केल्यामुळे गंभीर अवस्थेत पडलेला होता. स्थानिकांनी तात्काळ नाशिकरोड पोलिसांना याची माहिती दिली. पोलिसांनी घटनास्थळी धाव घेत किरणला तात्काळ रुग्णालयात उपचारासाठी दाखल केले. याप्रकरणी नाशिकरोड पोलीस ठाण्यात गुन्हा दाखल करण्यात आला असून, हत्येचे नेमके कारण अद्याप स्पष्ट झालेले नाही. पोलीस या प्रकरणाचा सखोल तपास करत आहेत.