नांदेड-हिंगोली महामार्गावर नियमाला हरताळ! अवघ्या ८० किमी अंतरात दोन टोल नाके सुरू असल्यामुळे वाहनचालकांवर अतिरिक्त आर्थिक भार

नांदेड ते हिंगोली जाणाऱ्या राष्ट्रीय महामार्गावर (नॅशनल हायवे १६१ आणि ३६१) प्रवाशांची आणि वाहनचालकांची अक्षरशः आर्थिक लूट होत असल्याचा प्रकार समोर आला आहे. अवघ्या ८० किलोमीटरच्या अंतरात दोन वेगवेगळे टोल नाके कार्यान्वित करण्यात आल्यामुळे वाहनचालकांमध्ये तीव्र नाराजी उसळली आहे. केंद्रीय रस्ते वाहतूक मंत्रालयाच्या नियमानुसार एका टोल नाक्यापासून दुसऱ्या टोल नाक्याचे अंतर किमान ६0 किलोमीटर असावे असा स्पष्ट नियम असताना, या नियमाला हरताळ फासल्याचे दिसून येत आहे.

नियमांचे उल्लंघन आणि वाहनचालकांची समस्या:

• ८० किलोमीटरच्या अंतरात दोन टोल नाके: नांदेडहून हिंगोलीकडे प्रवास करताना चालकांना अल्प अंतरामध्येच दोनदा टोल टॅक्स भरावा लागत आहे. राष्ट्रीय महामार्गावरील या नियमांच्या विसंगत असलेल्या रचनेमुळे नियमित प्रवास करणाऱ्या कार, जीप तसेच मालवाहू ट्रक चालकांच्या खिशाला मोठा फटका बसत आहे.

• वाहतूकदारांवर आणिसामान्यांवर आर्थिक भार: वाढत्या महागाईच्या काळात एकाच प्रवासात वारंवार टोल भरावा लागत असल्याने मालवाहतूक महागली आहे, ज्याचा थेट परिणाम दैनंदिन वापरातील वस्तूंच्या किमतींवर होत आहे. व्यावसायिक वाहनचालक आणि खासगी वाहनमालकांनी याप्रकरणी तीव्र संताप व्यक्त केला असून, राष्ट्रीय महामार्ग प्राधिकरणाने (NHAI) या संपूर्ण प्रकरणाची तातडीने चौकशी करावी, अशी मागणी जोर धरत आहे.

• नियमांच्या फेरबदलाची मागणी: एकाच पट्ट्यात दोन टोल नाके असणे नियमांच्या विरोधात असल्याने, यातील एकतर टोल नाका बंद करावा किंवा प्रवाशांना मासिक पासमध्ये सवलत व दीर्घकालीन दिलासा द्यावा, अशी आक्रमक भूमिका वाहनचालक संघटनांनी घेतली असून प्रशासनाने याकडे दुर्लक्ष केल्यास तीव्र आंदोलनाचा इशाराही देण्यात आला आहे.