Nagpur : ऐतिहासिक पाऊल! ‘बोइंग 777’ मेंटेनन्ससाठी अमेरिकेची मंजुरी; नागपूर ठरतंय एव्हिएशन हब

नागपूर : मिहानमधील एआय इंजिनीअरिंग सर्व्हिसेस लिमिटेडच्या (पूर्वीचे नाव एअर इंडिया इंजिनीअरिंग सर्व्हिसेस) एमआरओला फेडरल एव्हिएशन ॲडमिनिस्ट्रेशन अर्थात एफएएने मान्यता दिली आहे. त्यामुळे या एमआरओमध्ये आता ‘बोइंग 777’ची संपूर्ण देखभाल-दुरुस्ती शक्य होणार आहे.

मिहानच्या आर्थिक विशेष क्षेत्रामध्ये (सेझ) सुमारे 50 एकर जागेवर एआयईएसएलचे एमआरओ आहे. येथे एअर इंडियाच्या विमानांची देखभाल-दुरुस्ती होते. याशिवाय, वर्षभरापासून येथे कुवेत एअरलाइन्सच्या विमानांची देखभाल-दुरुस्ती करण्यात येत आहे. अशात या एमआरओला एफएएने बोइंग 777 च्या डी-चेकसाठी मान्यता दिली आहे. त्यामुळे बोइंग 777 विमानाची संपूर्ण उकल करणे (डीअसेम्बलिंग) तसेच धड, पंख, लँडिंग गिअर, संरचना यांची सखोल तपासणी आणि मोठ्या स्वरूपातील दुरुस्ती शक्य होणार आहे.

Maharashtra Weather : हुडहुडी भरवणारी थंडी! महाराष्ट्रात तापमान घसरले; नागरिकांना सतर्कतेचा इशारा ; पुढील 2 दिवस कडाक्याच्या थंडीचा अंदाज

ही तपासणी साधारणतः सहा ते 10 वर्षांतून एकदा केली जाते. विमान वाहतूक क्षेत्राचा विचार करता ही अत्यंत खर्चिक व वेळखाऊ अशा स्वरूपाची देखभाल असते. आंतरराष्ट्रीय स्तरावरील ही सुविधा मिहानमध्ये उपलब्ध होणे नागपूरच्या दृष्टीने मोठी उपलब्धी मानल्या जात आहे. अमेरिकेच्या एफएएकडून मिळणारी मान्यता ही विमान देखभालीच्या क्षेत्रातील सर्वात कठोर व विश्वासार्ह मानकांपैकी एक मानली जाते.

एआईएसएलच्या मिहानमधील एमआरओला ही मान्यता मिळाल्यामुळे येथे होणारी बोइंग 777 विमानांची देखभाल आंतरराष्ट्रीय सुरक्षा मानकांनुसार वैध व विश्वासार्ह ठरणार आहे. या मान्यतेमुळे या एमआरओमधील विमानांच्या देखभाल क्षमतेत मोठी वाढ झाली आहे. तसेच भारतातील एमआरओच्या रचनेला नवे बळ मिळाले आहे. या विस्तारामुळे नागपूर केंद्र देशांतर्गत व आंतरराष्ट्रीय विमान कंपन्यांसाठी प्रमुख बोइंग 777 मेंटेनन्स हब म्हणून उदयास आले आहे. तसेच यामुळे विदेशातील एमआरओवरील अवलंबित्व कमी होणार आहे.

जागतिक हबच्या दिशेने वाटचाल
एफएएच्या मान्यतेमुळे एआयईएसएलचे मिहान येथील एमआरओ ‘डी-चेक’ म्हणजेच विमान देखभालीच्या सर्वात व्यापक व गुंतागुंतीच्या टप्प्याचे काम करण्यास सक्षम झाले आहे. यासोबतच 4 हजार दिवस, 36 हजार तास उड्डाण आणि 18 हजार फ्लाइट सायकल्सपर्यंतच्या विमानांना सपोर्ट देण्याची पूर्ण क्षमता या केंद्रात निर्माण झाली आहे. त्यामुळे बोईंग 777 विमानांच्या संपूर्ण आयुष्यकालातील देखभाल सेवा एकाच ठिकाणी उपलब्ध होणार आहे. ‘आत्मनिर्भर भारत’ आणि भारताला जागतिक एमआरओ हब बनवण्याच्या दिशेने हे एक महत्त्वाचे पाउल ठरणार आहे.