Mumbai Mayor : भाजपचा धक्का! मुंबई महापौरपदासाठी महायुतीचा उमेदवार जाहीर, अमित साटम यांची मोठी घोषणा

Mumbai : मुंबईचा पुढचा महापौर कोण होणार, या प्रश्नाला पूर्णविराम मिळाला आहे. भारतीय जनता पक्षाकडून रितू तावडे यांना महापौरपदाची उमेदवारी घोषित करण्यात आली आहे. मुंबईचे महापौरपद खुल्या प्रवर्गातील महिला उमेदवारासाठी राखीव असल्याने मुंबईला पुन्हा महिला महापौर मिळणार, हे स्पष्ट होतं. तर मुंबईच्या उपमहापौरपदासाठी उपमुख्यमंत्री एकनाथ शिंदे यांच्या नेतृत्वातील शिवसेनेकडून उमेदवार जाहीर करण्यात आला आहे. मुंबईतील प्रभाग क्रमांक ५ मागाठाणेचे नगरसेवक संजय घाडी यांना शिवसेनेने उपमहापौरपदाचे तिकीट दिले आहे. हे उपमहापौरपद पुढील सव्वा वर्षांसाठी असेल, असेही शिवसेनेने आताच स्पष्ट केले आहे. संख्याबळ पाहता महायुतीच्या महापौर-उपमहापौर पदाच्या उमेदवारांचा विजय निश्चित मानला जात आहे.

शिवसेनेचे परिपत्रक
शिवसेना मुख्य नेते एकनाथ शिंदे यांच्या आदेशानुसार, बृहन्मुंबई महानगरपालिकेच्या उपमहापौर या पदासाठी शिवसेना भाजप महायुतीचे अधिकृत उमेदवार म्हणून संजय शंकर घाडी यांचे नाव जाहीर करण्यात येत आहे. सदर उपमहापौर पद सव्वा वर्षाकरिता असेल. तरी बृहन्मुंबई महानगरपालिका क्षेत्रातील संबंधित लोकप्रतिनिधी, पदाधिकारी व नगरसेवक यांनी नोंद घ्यावी व आदेशाचे पालन करावे.

महापौर आणि उपमहापौर पदासाठी नामनिर्देशन अर्ज भरण्याची अंतिम मुदत आज ७ फेब्रुवारी रोजी संपताना शिवसेना-भाजपने उमेदवाराचे नाव जाहीर केले. भाजप-शिवसेना महायुतीकडून महापौर आणि उपमहापौर पदासाठी अर्ज दाखल केले जाणार आहेत. यावेळी सर्व नगरसेवक उपस्थित राहत शक्तिप्रदर्शन करणार आहेत. तर शिवसेना उबाठा आणि काँग्रेसकडूनही महापौर-उपमहापौर पदासाठी उमेदवार दिले जाण्याची शक्यता वर्तवली जात आहे.

Mumbai Crime : साडेचार कोटींची सायबरलूट; अटकेची भीती दाखवून IITच्या माजी महिला अधिकाऱ्याची फसवणूक, प्रकरण काय?

मुंबई महापालिका निवडणुकीनंतर महापौर कोणाचा होणार, याकडे राजकीय वर्तुळाचे लक्ष लागून राहिले होते. भाजप आणि शिवसेनेने स्वतंत्र गटनोंदणी केली आहे, तर राष्ट्रवादी काँग्रेसची गटनोंदणी झाली असून शिवसेनेला पाठिंबा म्हणून केल्या जाणाऱ्या सहयोगी गटाची स्थापन होण्याची प्रतीक्षा आहे. तर राष्ट्रवादी काँग्रेस : शरदचंद्र पवार पक्षानेही शिवसेनेला पाठिंबा दिला आहे. नगरसेवकांचे संख्याबळ जास्त असल्याने महापौरपदासाठी ११ फेब्रुवारीला महापालिका मुख्यालयात होणाऱ्या निवडणुकीत महायुतीच्या विजयाचा मार्ग तुलनेने सोपा आहे. मात्र, ठाकरेसेना आणि काँग्रेसकडूनही उमेदवार देऊन रंगत आणली जाण्याची चिन्हं आहेत.

त्याच वेळी भाजप आणि शिवसेनेकडून स्थायी समिती अध्यक्ष, सुधार समिती, शिक्षण समिती, बेस्ट समितीसह अन्य समितीवरील अध्यक्षपद मिळवण्यासाठी चढाओढ लागली आहे.