मुंबई: "फ्लॅटमध्ये बाथरूमचा नळ सुरूये, तिथे एक डेड बॉडी ठेवलीय"आरोपी महिलेचा व्हाईस मेल ऐकताच घरमालक हादरला

मुंबई: कल्याणमधील मलंग रोडवर असलेल्या नीलकंठ सोसायटीत घडलेल्या या हायप्रोफाईल मर्डर मिस्ट्रीने संपूर्ण परिसरात प्रचंड खळबळ उडवून दिली आहे. प्रियकराची डोक्यात वार करून निर्घृण हत्या केल्यानंतर, आरोपी महिलेने अत्यंत थंड डोक्याने त्याचा मृतदेह एका पोत्यात भरला. पुरावे नष्ट करण्यासाठी तिने तब्बल २४ तास बाथरूमचा नळ सुरूच ठेवला, जेणेकरून मृतदेह पाण्यात भिजून लवकर सडावा आणि रक्ताचे डागही वाहून जावेत. हा क्रूर 'वॉटर प्लॅन' आखून महिला थेट कोलकात्याच्या दिशेने फरार झाली. मात्र, पळून गेल्यानंतर तिने घरमालकाला पाठवलेल्या एका व्हॉईसमेलमुळे या संपूर्ण थराराचा पर्दाफाश झाला.

व्हॉईसमेल ऐकला अन् घरमालकाच्या पायाखालची जमीन सरकली!
गेल्या दोन-तीन दिवसांपासून नीलकंठ सोसायटीतील या बंद घरातून प्रचंड दुर्गंधी येत होती. त्यातच फरार झालेल्या आरोपी महिलेचा घरमालकाला तो धक्कादायक व्हॉईसमेल आला. मेसेज ऐकताच हादरलेल्या घरमालकाने क्षणाचाही विलंब न करता तात्काळ मानपाडा पोलिसांना याची माहिती दिली. पोलिसांनी घटनास्थळी धाव घेत दरवाजा तोडून आत प्रवेश केला. बाथरूमच्या दिशेने गेल्यावर पोलिसांना एक संशयास्पद गोणी आढळून आली, ज्यात मृतदेह अत्यंत सडलेल्या अवस्थेत होता.

फॉरेन्सिक पथक दाखल; पोलिसांची पथके कोलकात्याकडे रवाना
मानपाडा पोलिसांनी याप्रकरणी हत्येचा गुन्हा दाखल केला असून घटनास्थळी फॉरेन्सिक पथकाने पाहणी करून महत्त्वाचे पुरावे गोळा केले आहेत. व्हॉईसमेलच्या महत्त्वाच्या धाग्यावरून पोलिसांनी आपली तपासाची चक्रे वेगाने फिरवली असून 'मोस्ट वाँटेड' आरोपी महिलेच्या अटकेसाठी पोलिसांची विशेष पथके थेट कोलकात्याकडे रवाना झाली आहेत. हत्येमागील नेमके कारण काय होते आणि यामध्ये आणखी कोणाचा सहभाग आहे का, याचा कसून तपास सध्या पोलीस करत आहेत.