पुणे: ऐतिहासिक कसबा गणपती मंदिरात मध्यरात्री चोरी; दानपेटी फोडून ६० हजारांची रोकड लंपास

पुणे: ग्रामदैवत असलेल्या कसबा गणपती मंदिरामध्ये मध्यरात्री चोरी झाल्याचा प्रकार समोर आला आहे. अज्ञात चोरट्यानेमंदिरातील दानपेटी फोडून अंदाजे ६० हजार रुपयांची रोकड लंपास केली आहे. पोलिसांनी दिलेल्या माहितीनुसार, सोमवारी (५ ऑक्टोबर) मध्यरात्रीच्या सुमारास अज्ञात चोरटा मंदिर परिसरात शिरला. त्यानंतर त्याने मंदिरातील दानपेटी फोडली. दानपेटीत जमा असलेली अंदाजे ६० हजार रुपयांची रक्कम घेऊन चोरट्याने पळ काढला.

चोरीचा हा संपूर्ण प्रकार मंदिरात लावण्यात आलेल्या सीसीटीव्ही कॅमेऱ्यात कैद झाला आहे. सीसीटीव्ही फुटेजमध्ये चोरट्याच्या हालचाली स्पष्टपणे दिसून आल्याची माहिती आहे. घटनेची माहिती मिळताच फरासखाना पोलिसांना याबाबत कळवण्यात आले. या प्रकरणी फरासखाना पोलीस ठाण्यात गुन्हा दाखल करण्याची प्रक्रिया सुरू आहे. सीसीटीव्ही फुटेजच्या आधारे चोरट्याची ओळख पटवण्याचे काम पोलिसांकडून सुरू करण्यात आले आहे.

पुण्याच्या ग्रामदैवताच्या मंदिरातच चोरी झाल्याने या घटनेमुळे परिसरात खळबळ उडाली आहे. चोरटा नेमका कोण आहे, त्याने मंदिरात प्रवेश कसा केला आणि चोरीनंतर तो कोणत्या दिशेने पसार झाला, याचा तपास आता पोलिसांकडून केला जात आहे. सीसीटीव्ही फुटेज आणि तांत्रिक तपासाच्या आधारे लवकरच चोरट्यापर्यंत पोहोचण्याचे पोलिसांसमोर आव्हान आहे.