Malshej Ghat ST Bus Accident : माळशेज घाटात एसटी बस आणि ट्रकचा भीषण अपघात, 6 प्रवासी गंभीर जखमी

Malshej Ghat On Kalyan- Nagar Road : माळशेज घाटामध्ये एसटी बस आणि ट्रकला भीषण अपघात झाल्याची घटना समोर आली आहे. या अपघातामध्ये सहा प्रवासी गंभीर जखमी झाले आहेत. या अपघातामुळे माळशेज घाटातील वाहतूक विस्कळीत झाली आहे. हा अपघात इतका भीषण होता की अपघातामध्ये ट्रक आणि एसटी बसचे मोठे नुकसान झाले आहे. महामार्ग पोलिसांकडून अपघाताचा तपास सुरु आहे.

मिळालेल्या माहितीनुसार, कल्याणवरुन आळेफाट्याच्या दिशेने एसटी बस जात होती. या एसटी बसने माळशेज घाटामध्ये ट्रकला जोरदार धडक दिली. अपघातामध्ये एसटीमधील सहा प्रवासी गंभीर जखमी झाले तर 15 जण किरकोळ जखमी झाले आहेत. स्थानिक नागरिक, घाटातून जाणारे प्रवासी आणि महामार्ग पोलिसांनी जखमींना तात्काळ रुग्णालयात उपचारासाठी दाखल केले. अपघातातील जखमी प्रवाशांवरआळेफाटा  येथील खासगी रुग्णालयात उपचार सुरु आहेत. या अपघाताचा तपास पोलिसांकडून सुरु आहे.

अपघातानंतर एसटी बस झाडं आणि रस्त्याच्या कठड्यामध्ये अडकल्यामुळे मोठा अनर्थ टळला. या अपघातामध्ये ट्रक आणि एसटी बसचे मोठे नुकसान झाले आहे. पावसाळ्यापूर्वी माळशेज घाटामध्ये ठिकठिकाणी दुरुस्तीचे काम सुरु आहे. या कामामुळे अनेक ठिकाणी एकेरी वाहतूक सुरु आहे. अशामध्ये घाटातील नागमोडी वळणं आणि उतार यामुळे वाहनांची वेग मर्यादा राहत नसल्यामुळे वारंवार अपघात वारंवार होत आहेत.