मुंबई: स्वातंत्रदिनापूर्वी मुंबईत दहशतीचे सावट! महापौर, शाळा, मेट्रो आणि शेअर बाजाराला बॉम्बने उडवण्याची धमकी; ईमेलमुळे खळबळ.

मुंबई: आगामी स्वातंत्र्यदिनाच्या पार्श्वभूमीवर देशाची आर्थिक राजधानी असलेल्या मुंबईतून एक अत्यंत खळबळजनक आणि गंभीर बातमी समोर आली आहे. स्वातंत्र्यदिनापूर्वी ( १५ ऑगस्ट ) मुंबईवर मोठा दहशतवादी हल्ला करण्याची धमकी देण्यात आली असून, मुंबईच्या महापौर रितू तावडे यांच्या अधिकृत ईमेल अकाउंटवर हा धमकीचा ई-मेल पाठवण्यात आला आहे. या धमकीच्या सत्रामुळे संपूर्ण पोलीस प्रशासन आणि सुरक्षा यंत्रणांमध्ये मोठी खळबळ उडाली असून शहरात हाय अलर्ट जारी करण्यात आला आहे.

कोणती ठिकाणे आहेत निशाण्यावर? प्राप्त माहितीनुसार, या धमकीच्या ईमेलमध्ये मुंबईतील अत्यंत महत्त्वाची आणि संवेदनशील ठिकाणे उडवून देण्याची धमकी देण्यात आली आहे. यामध्ये मुंबईच्या महापौरांचे कार्यालय आणि त्यांची अधिकृत गाडी, मुख्यमंत्री कार्यालय (CMO), ऐतिहासिक बॉम्बे स्टॉक एक्सचेंज (BSE) इमारत, तसेच शहरातील महत्त्वाच्या शाळा आणि मुंबई मेट्रोचा समावेश आहे. या मेलमध्ये असा दावा करण्यात आला आहे की, १५ ऑगस्टपूर्वी मुंबईत मोठे घातपात घडवून आणले जातील.

पालक आणि नागरिकांसाठी विशेष इशारा: या धमकीच्या ईमेलचे गांभीर्य लक्षात घेता सुरक्षा यंत्रणा अधिक सतर्क झाल्या आहेत. विशेष म्हणजे, या मेलमध्ये पालकांना आणि नागरिकांना एक गंभीर इशारा देण्यात आला असून, "मुलांना शाळेत पाठवू नका आणि प्रवासासाठी मेट्रोचा वापर करू नका," असे नमूद करण्यात आले आहे. तसेच या मेलमध्ये काही खलिस्तान समर्थक घोषणा आणि विशिष्ट व्यक्तींची नावे देखील नमूद करण्यात आली असल्यामुळे या प्रकरणाची व्याप्ती मोठी असण्याची शक्यता वर्तवली जात आहे.

घटनेची माहिती मिळताच मुंबई पोलिसांची गुन्हे शाखा, सायबर सेल आणि बॉम्ब शोधक व नाशक पथकाने (BDDS) तातडीने सूत्रे हलवली आहेत. संबंधित धमकीचा ईमेल कुणी पाठवला, त्याचा स्रोत (IP Address) नेमका कुठे आहे, याचा कसून शोध घेतला जात असून महापौरांच्या कार्यालयासह सर्व प्रमुख संवेदनशील ठिकाणांच्या सुरक्षेत मोठी वाढ करण्यात आली आहे. पोलीस या प्रकरणाचा सखोल तपास करत आहेत.