Pune : प्रचाराची रणधुमाळी आज थांबणार! शेवटच्या दिवशी कोण गाजवणार? कोणत्या नेत्याची कुठे सभा?

Pune :  नऊ वर्षांनंतर होत असलेल्या महापालिका निवडणुकीसाठीच्या प्रचाराच्या तोफा दहा दिवसांच्या रणधुमाळीनंतर आज (मंगळवारी) सायंकाळी थंडावतील. मागील दहा दिवसांपासून शहरावर राजकीय ज्वर चढल्याचे चित्र होते.

सत्तेतील मित्रपक्षांनीच एकमेकांवर केलेले आरोप प्रत्यारोप, जाहीरनाम्यातून दिलेली अनिर्बंध आश्वासने, सभा आणि मुलाखती, शहरभर फिरणाऱ्या कर्णेवाल्या रिक्षा, एलईडी स्क्रीन असलेल्या व्हॅन अशा विविध प्रकारे पुणेकरांनी हा प्रचार अनुभवला. आज अखेरच्या दिवशी मुख्यमंत्री, उपमुख्यमंत्र्यांच्या सभा व 'रोड शो'; तसेच राज ठाकरे यांच्या 'रोड शो'ने प्रचाराची सांगता होईल.

ZP Election : जिल्हा परिषद निवडणुकीची तारीख जाहीर; कोर्टाने आयोगाला दिली पुन्हा मुदत

पुण्यासह राज्यातील एकूण २९ महापालिकांसाठीची निवडणूक प्रक्रिया सध्या सुरू आहे. यासाठी राज्य निवडणूक आयोगाने १५ डिसेंबर रोजी निवडणुकांची घोषणा केली. तेव्हापासून आचारसंहिता लागू झाली. अर्ज दाखल करण्यासाठी ३० डिसेंबर ही अखेरची मुदत होती. त्यानंतर दोन जानेवारी रोजी अर्ज माघारीची प्रक्रिया पूर्ण झाल्यानंतर राजकीय चित्र स्पष्ट झाले. त्यानंतरच प्रचाराला खऱ्या अर्थाने रंगत

विविध पक्षांकडून पारंपरिक प्रचाराबरोबरच आधुनिक तंत्रज्ञानाचाही जोरदार वापर करण्यात आला. त्यामुळे शहरभर राजकीय रणधुमाळी अनुभवायला मिळाली. महापालिकेच्या निवडणुकीसाठी गुरुवारी (१५ जानेवारी) मतदान होणार आहे. त्यासाठी प्रचाराची मुदत आज (मंगळवारी) सायंकाळी साडेपाच वाजता संपुष्टात येणार आहे. त्यामुळे साडेपाचनंतर कोणत्याही प्रकारे प्रचार करता येणार नाही. साडेपाचनंतर सर्व राजकीय पक्षांनी बॅनर, पोस्टर्स, होर्डिंग्ज काढून घ्यावेत, असे आदेश महापालिका आयुक्त व शहर निवडणूक अधिकारी नवलकिशोर राम यांनी दिले आहेत.

वाण वाटण्यास बंदी
बुधवारी (१४ जानेवारी) मकर संक्रांत आहे. मकरसंक्रांतीला वाण (भेटवस्तू) वाटण्याची पद्धत आहे. याचा राजकीय वापर होण्याचीही शक्यता आहे. त्यामुळे राजकीय पक्ष व उमेदवारांना कुठल्याही प्रकारे भेटवस्तू-वाण वाटता येणार नाही. वाटल्यास कारवाई केली जाईल, अशी तंबीही नवलकिशोर राम यांनी दिली आहे.

अजित पवारांचा 'रोड शो'
राष्ट्रवादी काँग्रेससाठी उपमुख्यमंत्री अजित पवार हे मंगळवारी सकाळी साडेनऊ वाजता नन्हे येथून 'रोड शो'ला सुरुवात करतील. सिंहगड रस्ता, वारजे परिसरानंतर औंध बोपोडीत 'रोड शो' होईल. पक्षाचे प्रदेशाध्यक्ष सुनील तटकरे यांची दुपारी पत्रकार परिषद होणार आहे.

मुख्यमंत्र्यांची तोफ धडाडणार
मुख्यमंत्री देवेंद्र फडणवीस यांची जाहीर सभा आज दुपारी एक वाजता गोखलेनगर येथे होणार आहे. याशिवाय दुपारी केंद्रीय राज्यमंत्री मुरलीधर मोहोळ यांची पत्रकार परिषद होणार आहे, तर उमेदवारांनी प्रभागातून प्रचारफेरी काढण्याचे नियोजन केले आहे.

राज ठाकरे पुण्यात
यंदाच्या निवडणुकीत शिवसेना-मनसे यांची युती झाली आहे, तर शिवसेनेने काँग्रेससोबत आघाडी केली आहे. मनसेचे ४४ उमेदवार रिंगणात असून, त्यांच्या प्रचारासाठी आज अखेरच्या दिवशी मनसेचे सर्वेसर्वा राज ठाकरे पुण्यात येणार आहेत. उमेदवारांच्या प्रभागात जाऊन मतदारांची भेट घेणार आहे.