Jalna OBC Sabha : जालन्यात ओबीसींचा महाएल्गार; 'या' आहेत प्रमुख मागण्या

Jalna OBC Sabha :  मराठा समाजाला सरसकट ओबीसीमधून आरक्षण देऊ नयेत, या प्रमुख मागणीसह इतर मागण्यांसाठी आज जालन्यातील अंबडमध्ये भव्य ओबीसी सभा आयोजित करण्यात आली आहे. या सभेला राज्यभरातील महत्त्वाचे ओबीसी नेते हजर राहणार आहे. मंत्री छगन भुजबळ यांची प्रमुख उपस्थिती देखील या सभेत असणार आहे. त्यामुळे या सभेकडे आता राज्याचे लक्ष लागले आहे. सोबतच राज्यातील अनेक महत्वाचे ओबीसी नेते देखील या सभेला उपस्थित राहणार आहे. 

'या' आहेत प्रमुख मागण्या...

• ओबीसी प्रवर्गात मराठा समाजाचा समावेश करु नये
• बिहारच्या धर्तीवर राज्यात ओबीसींची जातनिहाय जनगणना करावी
• मराठा समाजाला दिलेली खोटी कुणबी प्रमाणपत्रे रद्द करावी
• खोटी बिंदू नामावली तयार करणाऱ्या अधिकाऱ्यांवर कारवाई करावी
• 7 सप्टेंबर 2023 रोजीचा कुणबी प्रमाणपत्रे देण्याचा जीआर रद्द करावा
• बंजारा समाजाचा एसटी प्रवर्गात समावेश करुन दाखल्यांचं वाटप करावं
• धनगर समाजाच्या एसटी आरक्षणाची अंमलबजावणी करावी.

Shiv Sena Clash : बाळासाहेब ठाकरे स्मृतीस्थळावर ठाकरे-शिंदे गटात राडा; पोलीस अॅक्शन मोडमध्ये, परिसरात तणावपूर्ण शांतता

मनोज जरांगेंच्या बालेकिल्ल्यात सभा

मनोज जरांगे यांच्या आंदोलनाची सुरुवात जालन्यातील आंतरवाली सराटी गावातून झाली. आता ओबीसींची सभा देखील जालना जिल्ह्यातच होत आहे. विशेष म्हणजे आंतरवाली सराटी गावापासून अवघ्या 20 किलोमीटर अंतरावर ही सभा होत आहे. त्यामुळे, मनोज जरांगे यांच्याच बालेकिल्ल्यात सभा घेऊन, मराठा समाजाला सरसकट ओबीसीमधून आरक्षण देण्यास आमचा विरोध असल्याचा संदेश ओबीसींकडून देण्याचा प्रयत्न असल्याचं बोललं जात आहे.

सरसकट मराठा आरक्षणाला विरोध... 

महाराष्ट्रातील सर्वच मराठ्यांना ओबीसीमधून सरसकट आरक्षण देण्याची मागणी मनोज जरांगे यांनी केली आहे. मात्र, त्यांच्या याच मागणीला ओबीसी नेत्यांनी विरोध केला आहे. तर, हाच विरोध दर्शवण्यासाठी आज अंबडमध्ये ओबीसींची जाहीर सभा होत आहे. या सभेला राज्यातील प्रमुख ओबीसी नेते हजर राहणार आहेत. तसेच, आपल्या भाषणातून सरसकट मराठा आरक्षणाला या ओबीसी नेत्यांकडून विरोध होण्याची शक्यता आहे.