भारताची महासत्ता होण्याकडे झेप! १० हजार किमी मारक क्षमता असलेल्या 'अग्नी-६' ची होणार चाचणी!

नवी दिल्ली: भारताच्या सामरिक सामर्थ्यात मोठी भर पडणार असून संरक्षण संशोधन आणि विकास संस्था (DRDO) आता 'अग्नी-६' (Agni-VI) या महाशक्तिशाली आंतरखंडीय बॅलिस्टिक क्षेपणास्त्राच्या (ICBM) चाचणीसाठी सज्ज झाली आहे. भारताचे हे पाऊल आशियातील लष्करी समतोल राखण्यासाठी आणि जागतिक स्तरावर भारताची ताकद सिद्ध करण्यासाठी अत्यंत महत्त्वाचे मानले जात आहे.

'अग्नी-६' हे क्षेपणास्त्र अग्नी मालिकेतील सर्वात प्रगत रूप असून त्याची मारक क्षमता ८,००० ते १०,००० किलोमीटरहून अधिक असणार आहे. हे क्षेपणास्त्र जमिनीवरून आणि पाणबुडीवरूनही डागता येण्यासारखे विकसित केले जात आहे. याची सर्वात मोठी ताकद म्हणजे याचे 'एमआयआरव्ही' (MIRV - Multiple Independently Targetable Re-entry Vehicle) तंत्रज्ञान. या तंत्रज्ञानामुळे हे क्षेपणास्त्र एकाच वेळी अनेक अण्वस्त्रे वाहून नेऊ शकते आणि शत्रूच्या वेगवेगळ्या लक्ष्यांवर एकाच वेळी अचूक मारा करू शकते.

या क्षेपणास्त्राच्या कक्षेत संपूर्ण आशिया, युरोप आणि आफ्रिका खंड येणार असल्याने चीनसह जगातील बलाढ्य देशांचे धाबे दणाणले आहेत. अग्नी-६ मुळे भारत आता अमेरिका, रशिया आणि चीनसारख्या मोजक्या देशांच्या पंक्तीत जाऊन बसेल ज्यांच्याकडे आंतरखंडीय मारक क्षमता आहे. सध्या या क्षेपणास्त्राच्या विविध तांत्रिक चाचण्या अंतिम टप्प्यात असून, लवकरच याचे पहिले उड्डाण होण्याची शक्यता आहे. भारताच्या या वाढत्या लष्करी शक्तीमुळे शत्रू राष्ट्रांना आता भारताकडे वाकड्या नजरेने पाहण्यापूर्वी दहावेळा विचार करावा लागेल.