शुभमंगल 'सावधान'! लग्नाचे आमिष दाखवून नवरदेवाने ४० वर्षीय महिलेला लावला २८ लाखांचा चुना; लग्नानंतर आरोपी पसार

मुंबई: मुंबईतील मुलुंड परिसरातून वैवाहिक फसवणुकीची एक धक्कादायक घटना समोर आली आहे. एका नराधमाने लग्नाचे आमिष दाखवून आणि भावनिक साद घालून एका ४० वर्षीय महिलेला तब्बल २८ लाख रुपये आणि सोन्याच्या दागिन्यांचा गंडा घातला आहे. लग्नानंतर काही दिवसातच हे "पितळ" उघडे पडल्याने आरोपी नवरदेव पसार झाला असून, पीडित महिलेने पोलिसांत धाव घेतली आहे.

मैत्रीचे रूपांतर प्रेमात आणि नंतर फसवणुकीत:
पीडित वासंती (नाव बदलले आहे) ही मुलुंड पूर्व येथे राहते. विक्रोळी येथील एका कॉल सेंटरमध्ये काम करत असताना तिची ओळख कमलेश दळवी याच्याशी झाली. कमलेशने आपल्या पत्नीचे निधन झाले असल्याचे सांगून वासंतीची सहानुभूती मिळवली. त्यांच्यातील मैत्रीचे रूपांतर हळूहळू प्रेमात झाले. वासंतीचा विश्वास संपादन केल्यानंतर कमलेशने आर्थिक अडचणी, व्यवसायातील नुकसान अशी वेगवेगळी कारणे सांगून तिच्याकडून पैसे घेण्यास सुरुवात केली.

४ वर्षांत उकळले लाखो रुपये:
सन २०२० ते २०२४ या चार वर्षांच्या कालावधीत कमलेशने वासंतीकडून २० लाख रुपये उकळले. त्यानंतर जेव्हा वासंतीने लग्नासाठी तगादा लावला, तेव्हा त्याने आपल्या भावाचा अपघात झाल्याचा बनाव रचला. त्याच्या उपचारासाठी वासंतीने स्वतःचे दागिने गहाण ठेवून आणखी ८ लाख रुपये त्याला दिले.

लग्नानंतर उडाला फज्जा:
अखेर दोघांचे लग्न झाले, मात्र लग्नाच्या दिवशी कमलेशच्या बाजूने एकही नातेवाईक उपस्थित नव्हता, ज्यामुळे संशय बळावला. लग्नानंतर राहण्यासाठी घर घेण्याच्या नावाखाली तो पुन्हा पैसे मागू लागला. तपासात समजले की कमलेशकडे स्वतःचे घरच नाही. आपले खोटेपण उघड होत असल्याचे पाहून कमलेशने पळ काढला.

पोलिसांत तक्रार दाखल:
आपली फसवणूक झाल्याचे लक्षात येताच वासंतीने नवघर पोलीस ठाण्यात कमलेश दळवी विरुद्ध तक्रार दाखल केली आहे. पोलिसांनी याप्रकरणी फसवणुकीचा गुन्हा दाखल केला असून आरोपीचा शोध सुरू आहे.

अशा प्रकारे लग्नाचे आमिष दाखवून फसवणूक करणाऱ्या टोळ्यांपासून सावध राहण्याचे आवाहन पोलिसांनी केले आहे.