जुन्नरमध्ये थरारक सिनेस्टाईल ड्रामा..! संशयितांनी काढले गावठी कट्टे, पण वाघासारख्या ग्रामस्थांनी जीवाची बाजी लावून उधळला डाव!

जुन्नर / ओतूर: जुन्नर तालुक्यातील नगर-कल्याण महामार्गावरील कोळवाडी येथे रविवारी सकाळी चोरीच्या संशयावरून एक अत्यंत थरारक आणि सिनेस्टाईल घटना घडली. संशयास्पद बोलेरो वाहनातून फिरणाऱ्या पाच जणांच्या टोळीतील दोघांना ग्रामस्थांनी मोठ्या धाडसाने पाठलाग करून पकडले आणि पोलिसांच्या ताब्यात दिले. मात्र, हातात गावठी कट्टे व इतर जीवघेणी हत्यारे असल्याने त्यांचे इतर तीन साथीदार हवेत हत्यारे चमकवत घटनास्थळावरून पळून जाण्यात यशस्वी ठरले.

नेमकं काय घडलं? ओतूर पोलिसांनी दिलेल्या प्राथमिक माहितीनुसार, सोनुसिंग पापसिंग दुधानी (वय ३५, रा. हडपसर, पुणे) आणि जिलूसिंग शेरसिंग दुधानी (वय ३८, रा. खोपोली, रायगड) अशी पकडलेल्या दोघांची नावे आहेत. संशयित आरोपी वापरत असलेले एमएच १७ एजे ३०७५ क्रमांकाचे बोलेरो वाहन हे अहिल्यानगर जिल्ह्यातील राहुरी तालुक्यातील कोल्हार येथून चोरीला गेले असल्याचा संशय आहे.

रविवार सकाळी ही बोलेरो गाडी कोळवाडीतील एका हॉटेलजवळ संशयास्पद रितीने उभी होती. स्थानिक नागरिक विघ्नेश घोलप यांना ही गाडी ओळखीची वाटल्याने त्यांनी तेथे जाऊन वाहनाबाबत चौकशी केली आणि आरोपींकडे गाडीची चावी मागितली. यावरून संशयित आणि घोलप यांच्यात जोरदार वाद सुरू झाला. वाद वाढताच गाडीतील आरोपींनी अचानक थेट हत्यारे बाहेर काढली, ज्यामुळे परिसरात एकच खळबळ उडाली आणि भीतीचे वातावरण निर्माण झाले.

ग्रामस्थांचे धाडस आणि पाठलाग: हत्यारे निघाल्याची माहिती मिळताच कोळवाडी परिसरातील ग्रामस्थ मोठ्या संख्येने गोळा झाले. आरोपींनी गावठी कट्टे दाखवूनही ग्रामस्थांनी माघार घेतली नाही. त्यांनी धाडस दाखवून एका संशयिताला तिथेच जागेवर दबोचले, तर दुसरा पळून जात असताना शेजारील शेतात पाठलाग करून त्याला नागरिकांनी पकडले. या झटापटीत संतप्त नागरिकांनी पकडलेल्या दोघांना चांगलाच चोप दिला. मात्र, उर्वरित तीन साथीदारांनी त्यांच्याकडील गावठी कट्टे आणि तीक्ष्ण हत्यारांचा धाक दाखवून ग्रामस्थांना चकवा दिला व पळ काढला.

वाहनातून हत्यारे जप्त, आरोपींवर अनेक गुन्हे: घटनेची माहिती मिळताच ओतूर पोलिसांनी तातडीने धाव घेत दोन्ही जखमी आरोपींना ताब्यात घेतले आणि उपचारासाठी ओतूर प्राथमिक आरोग्य केंद्रात दाखल केले. पोलिसांच्या प्राथमिक तपासात ताब्यातील दोन्ही संशयितांवर राज्यातील विविध पोलीस ठाण्यांमध्ये गंभीर स्वरूपाचे अनेक गुन्हे दाखल असल्याचे उघड झाले आहे. तसेच त्यांच्या बोलेरो वाहनातून पोलिसांनी विविध प्रकारची घातक हत्यारे जप्त केली आहेत. फरार झालेल्या तिघांबाबत आरोपींनी माहिती देण्यास नकार दिला आहे.

सध्या उपविभागीय पोलीस अधिकारी धनंजय पाटील आणि ओतूर पोलीस ठाण्याचे सहाय्यक पोलीस निरीक्षक ज्ञानेश्वर बाजगिरे यांच्या मार्गदर्शनाखाली विशेष पथके फरार आरोपींचा शोध घेत आहेत. या घटनेमुळे कोळवाडी परिसरात काही काळ प्रचंड तणाव निर्माण झाला होता.