पुणे: ओतूर येथे भीषण अपघात; वडिलांसह ३ वर्षांच्या चिमुकलीचा मृत्यू, तिघे गंभीर जखमी

पुणे: जिल्ह्यातील नगर-कल्याण महामार्गावर ओतूर येथील निमंत्रण हॉटेलजवळ रविवारी (दि. २१) दुपारी १२.१६ च्या सुमारास एक भीषण अपघात घडला. या अपघातात एका पित्याचा आणि त्यांच्या ३ वर्षांच्या मुलीचा जागीच मृत्यू झाला आहे.

नेमकी घटना काय? आळेफाटा येथून कल्याणच्या दिशेने जाणारी मोटारसायकल (MH 17 DD 3215) आणि कल्याणहून आळेफाट्याकडे येणारा आयशर ट्रक (MH 04 MR 8867) यांच्यात समोरासमोर जोरदार धडक झाली. ही धडक इतकी भीषण होती की मोटारसायकलवरील पाचही जण दूरवर फेकले गेले. या संपूर्ण घटनेचे थरारक दृश्य परिसरातील सीसीटीव्ही कॅमेऱ्यात कैद झाले आहे.

 

मृत आणि जखमींची माहितीया दुर्घटनेत अजय बबन दुधवडे (वय २१) आणि त्यांची ३ वर्षांची मुलगी अनुजा अजय दुधवडे (रा. माळवंदवाडी, घारगाव, जि. अहिल्यानगर) यांचा जागीच मृत्यू झाला. या अपघातात सलोनी अजय दुधवडे, तनुजा अजय दुधवडे आणि सुदर्शन गौतम केदार हे तिघे जखमी झाले असून,
त्यांच्यावर आळेफाटा येथील खासगी रुग्णालयात उपचार सुरू आहेत. अपघाताची माहिती मिळताच सहायक पोलीस निरीक्षक ज्ञानेश्वर बाजगिरे यांच्या मार्गदर्शनाखाली पोलिसांनी घटनास्थळी धाव घेतली. रस्ते मोकळे करून वाहतूक सुरळीत करण्यात आली असून, ओतूर पोलीस ठाण्यात या अपघाताची नोंद
करण्यात आली आहे. सध्या पोलीस या प्रकरणाचा अधिक तपास करत आहेत.