enelia Deshmukh Appointed Brand Ambassadors for MSRTC’s ‘Lal Pari’

मुंबई: महाराष्ट्राची जीवनवाहिनी समजल्या जाणाऱ्या एसटी महामंडळाने (MSRTC) आपली प्रतिमा अधिक आधुनिक आणि प्रवाशाभिमुख करण्यासाठी एक मोठा निर्णय घेतला आहे. लोकप्रिय अभिनेता रितेश देशमुख आणि अभिनेत्री जेनेलिया देशमुख यांची एसटी महामंडळाचे नवे ब्रँड ॲम्बेसिडर म्हणून निवड करण्यात आली आहे. या स्टार कपलच्या लोकप्रियतेचा फायदा घेऊन तरुण पिढीला सार्वजनिक वाहतुकीकडे आकर्षित करण्याचा प्रशासनाचा मानस आहे.

काय आहे नवीन योजना?
यापूर्वी मकरंद अनासपुरे आणि दिवंगत विक्रम गोखले यांसारख्या दिग्गजांनी एसटीचे ब्रँड ॲम्बेसिडर म्हणून जबाबदारी सांभाळली होती. आता रितेश आणि जेनेलिया ही जोडी पुढील ५ वर्षांसाठी एसटीच्या विविध जाहिराती, प्रचार मोहिमा आणि सामाजिक उपक्रमांमध्ये सहभागी होणार आहे. ग्रामीण भागासोबतच शहरी प्रवाशांनाही एसटी प्रवासाचे महत्त्व पटवून देण्यासाठी ही जोडी काम करणार आहे.

लवकरच अधिकृत करार:
मिळालेल्या माहितीनुसार, परिवहन मंत्री प्रताप सरनाईक लवकरच या स्टार जोडीसोबत अधिकृत करार करणार आहेत. रितेश आणि जेनेलिया सध्या त्यांच्या आगामी 'राजा शिवाजी' चित्रपटामुळे चर्चेत आहेत. आता एसटीच्या माध्यमातून ते महाराष्ट्राच्या घराघरात पोहोचणार आहेत. प्रवाशांची संख्या वाढवणे आणि 'लालपरी'ची प्रतिमा सुधारणे हे या निवडीचे मुख्य उद्दिष्ट आहे.