पुणे: निगडीत २७ तास 'डिजिटल अरेस्ट'; ८१ वर्षीय पित्याच्या सतर्कतेमुळे वाचले १२ लाख रुपये

पुणे: पुणे जिल्ह्यातील निगडी परिसरातून सायबर गुन्हेगारीची एक धक्कादायक घटना समोर आली आहे. एका जोडप्याला "तुमच्या पार्सलमध्ये ड्रग्ज सापडले आहे" अशी भीती घालून सायबर भामट्यांनी तब्बल २७ तास घरातच 'डिजिटल अरेस्ट' केले होते. मात्र, एका ८१ वर्षीय वृद्धाच्या प्रसंगावधामुळे त्यांचा मुलगा आणि सून एका मोठ्या फसवणुकीतून वाचले असून, १२ लाख रुपये सायबर चोरट्यांच्या हाती लागण्यापासून बचावले आहेत.

नेमकी घटना काय?
रविवारी सकाळी ११ च्या सुमारास निगडीतील एका तरुणाला व्हॉट्सअ‍ॅपवर कॉल आला. फोन करणाऱ्याने मुंबई पोलीस गुन्हे शाखेचा अधिकारी असल्याचे सांगून, तरुणाच्या नावाच्या पार्सलमध्ये अमली पदार्थ सापडल्याची भीती घातली. त्यानंतर त्याला 'सिग्नल' अ‍ॅप डाऊनलोड करायला लावून व्हिडिओ कॉलद्वारे सतत देखरेखीखाली (डिजिटल अरेस्ट) ठेवले. घाबरलेल्या तरुणाकडून भामट्यांनी बँक खात्याची माहिती घेतली आणि गुन्ह्यातून सुटण्यासाठी १२ लाख रुपयांची मागणी केली.

वडिलांनी फिरवला डाव:
तरुणाने घाबरून आपल्या म्युच्युअल फंडातून पैसे काढण्याची प्रक्रियाही सुरू केली होती. मात्र, त्याने कसाबसा वडिलांना हा प्रकार सांगितला. ८१ वर्षीय वडिलांनी पिंपरी-चिंचवड पोलिसांनी केलेल्या जनजागृती मोहिमेमुळे हा सायबर फसवणुकीचा प्रकार असल्याचे ओळखले. त्यांनी वेळ न घालवता तात्काळ सायबर पोलीस ठाण्यातील अंमलदारांशी संपर्क साधला.

पोलिसांची धडक कारवाई:
घटनेची माहिती मिळताच पोलिसांनी तातडीने पीडिताच्या घरी धाव घेतली. पोलीस घरात शिरल्याचे पाहताच सायबर गुन्हेगारांनी व्हिडिओ कॉल कट केला आणि तिथून पळ काढला. यामुळे १२ लाख रुपये ट्रान्सफर होण्यापूर्वीच हा मोठा धोका टळला. पोलिसांनी नागरिकांना आवाहन केले आहे की, कोणतेही सरकारी खाते अशा प्रकारे व्हिडिओ कॉलवर 'डिजिटल अरेस्ट' करत नाही, अशा संशयास्पद कॉल्सना बळी पडू नका.