पुणे नसरापूर चिमुकली हत्या प्रकरण: तीन लहान मुलांची न्यायालयात महत्त्वाची साक्ष; आरोपीच्या कृत्याचा केला पर्दाफाश

पुणे: भोर तालुक्यातील नसरापूर येथील चिमुकलीवरील अत्याचार आणि हत्या प्रकरणात आता न्यायालयात महत्त्वाची घडामोड घडली आहे. या प्रकरणातील मुख्य आरोपीवर दोष निश्चिती करण्यात आली असून, कोर्टात सुनावणी सुरू आहे. या घटनेवेळी पीडित मुलीला आरोपीसोबत पत्र्याच्या शेडमध्ये पाहणाऱ्या तीन लहान मुलांनी अत्यंत धाडसाने न्यायालयात आपली साक्ष दिली आहे. येरवडा कारागृहात झालेल्या ओळख परेडमध्ये आणि त्यानंतर कोर्टात व्हिडिओ कॉन्फरन्सद्वारे हजर असलेल्या आरोपीला या तीन मुलांनी स्पष्टपणे ओळखले आहे.

मुलांनी काय पाहिले?
घटनेच्या दिवशी ही तिन्ही मुले त्याच परिसरात खेळत होती. आरोपीने त्यांना हटकण्याचा प्रयत्न केला होता, पण मुलांनी गोठ्याच्या फटीतून आरोपीला पीडितेसोबत पाहिले होते. आरोपीने या मुलांना पाहून त्यांच्यावर दगडफेक केली होती, ज्यामुळे मुले तेथून निघून गेली होती. हा सर्व घटनाक्रम मुलांनी न्यायालयात निर्भीडपणे सांगितला आहे. या खटल्यात सरकारी पक्षाने एकूण ८२ साक्षीदारांची यादी सादर केली असून, त्यापैकी १६ जणांची साक्ष नोंदवण्यात आली आहे.

नेमकं काय घडलं होतं?
१ मे रोजी नसरापूर येथे ६५ वर्षीय नराधमाने घरासमोर खेळणाऱ्या चिमुकलीला 'वासरू दाखवतो' असे सांगून गोठ्यात नेले आणि तिच्यावर लैंगिक अत्याचार केला. त्यानंतर दगडाने ठेचून तिची निर्घृण हत्या केली आणि मृतदेह शेणाच्या ढिगाऱ्याखाली लपवून ठेवला. सीसीटीव्ही फुटेजमुळे ही घटना उघडकीस आली होती.

आरोपीने न्यायालयात हे कृत्य केवळ 'मारामारीचे किरकोळ प्रकरण' असल्याचे सांगून बेजबाबदार विधान केले होते. या नराधमाचा इतिहास गुन्हेगारीचा असून याआधीही तो दोनदा निर्दोष सुटला होता. त्यामुळे या प्रकरणात त्याला कठोर शिक्षा व्हावी, अशी मागणी सर्व स्तरातून होत आहे.

 

ताज्या बातम्यांसाठी लिंकवर क्लिक करा: https://punenewws24.in