सोलापूर: १६ वर्षांचा संसार मोडल्याने पत्नीला धडा शिकवण्यासाठी पतीने केले चक्क गाढविणीशी लग्न

सोलापूर: आपल्याला सोडून गेलेली बायको परत मिळावी म्हणून दीपक सूर्यवंशी या व्यक्तीने सोमवारी गाढविणीसोबत प्रतीकात्मक विवाह केला. जिल्हा परिषद, पूनम गेटसमोर सोमवारी दुपारी हे अनोखं आंदोलन झालं. या प्रकरणी पोलिसांनी सूर्यवंशी यांना ताब्यात घेतलं. रात्री १०.३० पर्यंत पोलीस कारवाईबाबत निर्णय घेत होते. 

सूर्यवंशी १५ दिवसांपासून पूनम गेटसमोर आंदोलनाला बसले आहेत. ३० सप्टेंबर रोजी यासंदर्भात त्यांनी जिल्हा प्रशासन आणि पोलिस अधीक्षक कार्यालयाला निवेदन दिले होते. आपला १६ वर्षाचा संसार तुटला. या प्रकरणात पत्नीच्या नात्यातील दोन व्यक्तींचा समावेश आहे.

प्रशासनाकडून या प्रकरणी कोणतीही दखल घेतली जात नसल्याने गाढविणीसोबत लग्न करणार असल्याचे जाहीर केले होते. त्यानुसार त्यांनी सोमवारी एक गाढवीण आणली. मंगलाष्टके आणि गाढविणीच्या गळ्यात पुष्पहार अर्पण करून त्यांनी हा प्रतीकात्मक विवाह केला. यावेळी त्यांच्यासोबत त्यांचे काही मित्र उपस्थित होते. सायंकाळी पाच वाजता पोलिसांनी सूर्यवंशी यांना थेट पोलीस ठाण्यात आणले. रात्री उशिरापर्यंत ते तिथेच थांबून होते.

लग्न ही महाराष्ट्रातील गंभीर समस्या झाली आहे. अनेक तरुणांचे विवाह जुळत नाहीत. मुलांबद्दल मुलीकडचे लोक अनेक अपेक्षा ठेवून असतात. त्यामुळे लग्नाळू तरुण व्यसनाधीन झाले आहेत. आता मला माझा संसार करायचा आहे. त्यामुळे मी प्रतीकात्मक आंदोलन केले. जिल्हा परिषदेसमोर गाढव फिरत असतात. तिथूनच या गाढवांना ताब्यात घेतले होते. आता पोलिसांनी माझ्यावर जी कारवाई करायची आहे ती करावी.

न्यायासाठी १५ दिवसांचे धरणे आंदोलन आणि अनोखा विवाह

गेल्या १५ दिवसांपासून आपली पत्नी पूजा सूर्यवंशी ही पुन्हा आपल्यासोबत संसार करण्यासाठी परत यावी, यासाठी दीपक सूर्यवंशी सोलापूर जिल्हाधिकारी कार्यालय आणि जिल्हा परिषद गेटसमोर बेमुदत धरणे आंदोलनाला बसले होते. प्रशासनाने आणि संबंधित व्यक्तींनी आपल्या समस्येची दखल घ्यावी, यासाठी त्यांनी हे उपोषण छेडले होते. मात्र, प्रशासनाकडून किंवा संबंधित मंडळींकडून कोणतीही ठोस दखल घेतली जात नसल्याने अखेर वैफल्यग्रस्त होऊन त्यांनी एक अत्यंत टोकाचे आणि लक्षवेधी पाऊल उचलले.

दीपक सूर्यवंशी यांनी प्रशासनाचे डोळे उघडण्यासाठी आणि या प्रकरणाचा निषेध नोंदवण्यासाठी चक्क एका गाढविणीशी रीतसर प्रतिकात्मक विवाह केला. या अनोख्या लग्नाचे आयोजन जिल्हाधिकारी कार्यालय परिसराबाहेर करण्यात आले होते. या विवाह सोहळ्यात रीतसर मंगलाष्टक म्हणण्यात आल्या आणि दीपक यांनी गाढविणीच्या गळ्यात पुष्पहार अर्पण करून अक्षता टाकल्या. या अनोख्या लग्नाचे फोटो आणि व्हिडिओ सोशल मीडियावर प्रचंड व्हायरल झाले आहेत. विशेष म्हणजे, या आंदोलनाच्या ठिकाणी त्यांनी महाराष्ट्राच्या प्रमुख नेत्यांचे छायाचित्र असलेले बॅनरही लावले होते, ज्यावर "माझा संसार मोडण्यासाठी प्रशासन जागे व्हा, माझा दोष काय?" असे भावनिक आणि सवाल करणारे मजकूर लिहिलेले होते. या संपूर्ण प्रकरणामुळे सोलापूर शहरात मोठी चर्चा सुरू असून, एका बाजूला या प्रकाराची खिल्ली उडवली जात आहे, तर दुसरीकडे कौटुंबिक वादाच्या या विचित्र मार्गावर उलटसुलट चर्चा सुरू आहेत.