सिलिकॉन व्हॅलीच्या धर्तीवर बारामतीत उभारणार 'इनोव्हेशन व्हॅली'; कृत्रिम बुद्धिमत्तेच्या मुद्द्यावर शरद पवारांची मोठी घोषणा

पुणे जिल्ह्यातील बारामती हे शहर आता तंत्रज्ञान, शिक्षण आणि आधुनिक संशोधनाचे एक मोठे हब बनण्याच्या दिशेने वेगाने पावले टाकत आहे. कृत्रिम बुद्धिमत्ता (AI) आणि आधुनिक तंत्रज्ञानाच्या क्षेत्रात बारामतीला जागतिक पातळीवर एक वेगळी ओळख मिळवून देण्यासाठी अमेरिकेतील प्रसिद्ध 'सिलिकॉन व्हॅली'च्या धर्तीवर बारामतीत एक अत्याधुनिक 'इनोव्हेशन व्हॅली' (Innovation Valley) उभारण्यात येणार असल्याची महत्त्वाची घोषणा ज्येष्ठ नेते शरद पवार यांनी केली आहे. तंत्रज्ञान आणि रोजगाराच्या नवीन संधी ग्रामीण भागापर्यंत पोहोचवण्याच्या दृष्टीने हे एक ऐतिहासिक पाऊल मानले जात आहे.

बारामती येथील विद्या प्रतिष्ठानच्या प्रांगणात उभारण्यात आलेल्या अत्याधुनिक अशा 'विद्या प्रतिष्ठान शरदचंद्र पवार सेंटर ऑफ एक्सलन्स इन आर्टिफिशियल इंटेलिजन्स' (Sharad Pawar Centre of Excellence in AI) या देशातील अत्यंत आधुनिक व ग्रामीण जीवनाचा चेहरामोहरा बदलणाऱ्या केंद्राचे उद्घाटन उद्योगपती गौतम अदानी आणि अदानी फाऊंडेशनच्या प्रमुख प्रीती अदानी यांच्या प्रमुख उपस्थितीत मोठ्या उत्साहात पार पडले. या उद्घाटनाच्या पार्श्वभूमीवर आणि भविष्यातील तंत्रज्ञानाच्या प्रसाराबाबत बोलताना शरद पवार यांनी बारामतीला टेक्नॉलॉजी आणि इनोव्हेशनचे मोठे केंद्र बनवण्याचा आपला मानस स्पष्ट केला.

कार्यक्रमादरम्यान बोलताना शरद पवार म्हणाले की, आजचे जग हे पूर्णपणे कृत्रिम बुद्धिमत्ता (Artificial Intelligence), रोबोटिक्स आणि आधुनिक तंत्रज्ञानावर चालणारे आहे. या परिवर्तनापासून ग्रामीण भाग मागे राहता कामा नये. शेती, आरोग्य, शिक्षण आणि उद्योग क्षेत्रात 'एआय'च्या माध्यमातून क्रांती घडवता येऊ शकते. याच उद्देशासमोर ठेवून अमेरिकेच्या सिलिकॉन व्हॅलीच्या धर्तीवर बारामतीमध्ये संशोधक, तरुण आणि तंत्रज्ञानप्रेमींसाठी 'इनोव्हेशन व्हॅली' विकसित केली जाईल. यामध्ये स्टार्टअप्सना प्रोत्साहन देणे, उच्च दर्जाचे प्रशिक्षण देणे आणि आधुनिक तंत्रज्ञानाचा वापर करून ग्रामीण व शेतीसंबंधीच्या समस्या सोडवण्यावर विशेष भर दिला जाणार असल्याचे त्यांनी सांगितले.

उद्योगपती गौतम अदानी यांनीही या केंद्राच्या उद्घाटनाप्रसंगी बोलताना कृत्रिम बुद्धिमत्तेकडे केवळ एक सोयीसुविधा किंवा मनोरंजनाचे साधन म्हणून न बघता, त्याकडे देशाचे एक प्रमुख 'राष्ट्रीय सामर्थ्य' म्हणून पाहिले पाहिजे, असे मत व्यक्त केले. या केंद्रामुळे बारामती परिसरातील विद्यार्थ्यांना आणि तरुणांना जागतिक दर्जाचे शिक्षण व तांत्रिक ज्ञान मिळण्याचा मार्ग मोकळा झाला असून, येत्या काळात बारामती हे देशातील टेक्नॉलॉजी आणि इनोव्हेशनचे एक प्रमुख केंद्र म्हणून उदयाला येईल, असा विश्वास व्यक्त केला जात आहे.