Badlapur : भाजपवर नामुष्की! चौफेर टीकेनंतर अवघ्या 24 तासांत राजीनामा

Badlapur : बदलापूर येथील शैक्षणिक संस्थेचे सचिव तुषार आपटे यांना भाजपनं स्वीकृत नगरसेवक म्हणून संधी दिली होती. यानंतर भाजपवर चहूबाजूंनी टीका झाली. दोन वर्षांपूर्वी राज्याला हादरवणाऱ्या बदलापूर शहरातील दोन लहान मुलींवर लैंगिक अत्याचार झाला होता. आपटे त्या प्रकरणातील सहआरोपी आहेत. जामिनावर सुटका झालेल्या आपटेला स्वीकृत नगरसेवक पदी संधी दिल्यानं भाजप वर टीका झाली. यानंतर आपटे यांनी नगरसेवकपदाचा राजीनामा दिला आहे. भाजप प्रदेशाध्यक्ष रविंद्र चव्हाण यांच्या आदेशानंतर आपटे यांनी राजीनामा दिला.

कुळगाव-बदलापूर नगरपरिषदेत शुक्रवारी झालेल्या स्वीकृत नगरसेवकांच्या निवडीत भाजपच्या दोन, शिवसेनेच्या दोन, तर राष्ट्रवादी काँग्रेसच्या एका सदस्याची निवड करण्यात आली. शुक्रवारी नवीन प्रशासकीय इमारतीमधील सभागृहात पार पडलेल्या पहिल्या सभेत एकूण पाच स्वीकृत नगरसेवकांची निवड जाहीर झाली. भाजपनं बदलापूर येथील शैक्षणिक संस्थेचे सचिव तुषार आपटे यांनी कुळगाव-बदलापूर नगरपरिषदेत स्वीकृत नगरसेवक म्हणून संधी दिली. याबद्दल समाजाच्या सर्वच स्तरातून संताप व्यक्त झाला. विरोधकांनी भाजपला लक्ष्य केलं.

महायुती-१ सरकार सत्तेत असताना बदलापूरमधील शाळेत चिमुकल्या विद्यार्थ्यांवर अत्याचार झाला होता. या प्रकरणात शाळेचे पदाधिकारीही आरोपी होते. तुषार आपटेंचा समावेश याच आरोपींमध्ये होता. संस्थेचे सचिव असलेले आपटे अत्याचार प्रकरणानंतर अनेक दिवस फरार होते. ४४ दिवसांनंतर त्यांना कर्जतमधून अटक झाली. यानंतर केवळ ४८ तासांत त्यांना जामीन झाला. यानंतरही ते याच शैक्षणिक संस्थेवर कार्यरत होते. तसंच भाजपकडून पालिका निवडणुकीतही सक्रिय होते.

Parbhani : भाजपकडून दिग्गजांना डावलून 22 वर्षांच्या तरुणाला उमेदवारी; नेमका आहे तरी कोण?

भाजपकडून स्वीकृत नगरसेवकपदी कोणाची वर्णी लागणार, याबद्दल राजकीय वर्तुळात उत्सुकता होती. शुक्रवारी भाजपनं तुषार आपटे यांची निवड केली. यावरुन विरोधकांनी भाजपला घेरलं. विकृताला भाजपनं स्वीकृत केलं, अशा शब्दांत शिवसेना उबाठाचे प्रमुख उद्धव ठाकरे यांनी भाजपवर बोचरा वार केला. त्यामुळे आपटे यांची निवड वादग्रस्त ठरली. त्यातच २९ महापालिका निवडणुकांच्या प्रचारात हा मुद्दा अंगलट येणार असल्याचं भाजपच्या लक्षात आलं. त्यामुळे आपटे यांना राजीनामा देण्याच्या सूचना देण्यात आल्या.