एथर एनर्जीचा नवीन 'ईएल' प्लॅटफॉर्मवर आधारित ई-स्कुटर २९ ऑगस्ट रोजी होणार लाँच; पहिली झलक आली समोर

इलेक्ट्रिक वाहन (EV) क्षेत्रात आघाडीवर असलेल्या 'एथर एनर्जी' (Ather Energy) कंपनीने त्यांच्या आगामी नवीन मास-मार्केट (सर्वसामान्य ग्राहकांसाठी) इलेक्ट्रिक स्कूटरची पहिली झलक अधिकृतपणे जाहीर केली आहे. एथरचे सह-संस्थापक आणि सीईओ तरुण मेहता यांनी सोशल मीडियावर असेंब्ली लाइनवरील या नवीन प्रॉडक्शन-रेडी स्कूटरचा फोटो शेअर केला असून, या घोषणेमुळे ऑटोमोबाईल क्षेत्रात मोठी उत्सुकता निर्माण झाली आहे. ही नवीन इलेक्ट्रिक स्कूटर आगामी 'एथर कम्युनिटी डे' (Ather Community Day) सोहळ्यात म्हणजेच २९ ऑगस्ट २०२६ रोजी जागतिक स्तरावर अधिकृतपणे लाँच केली जाणार आहे.

ही नवीन ई-स्कुटर कंपनीच्या पूर्णपणे नवीन आणि मॉड्यूलर अशा 'ईएल' (EL Platform) प्लॅटफॉर्मवर विकसित करण्यात आली आहे. एथरने मागील वर्षी सादर केलेल्या 'EL01' कॉन्सेप्टवर ही स्कूटर आधारित असून, तिची रचना (डाईझाइन) व्यावहारिक आणि फॅमिली-ओरिएंटेड ठेवण्यात आली आहे. कंपनीच्या यापूर्वीच्या ४५० (450 Series) सिरीजमधील स्कुटर या प्रामुख्याने परफॉर्मन्सवर आधारित आहेत, मात्र 'ईएल' प्लॅटफॉर्म विशेषतः मोठ्या प्रमाणात विक्री होणाऱ्या कम्युटर आणि फॅमिली स्कूटर सेगमेंटला डोळ्यासमोर ठेवून डिझाइन करण्यात आला आहे. याद्वारे कंपनीचा उद्देश भारतीय बाजारात अधिक ग्राहकांपर्यंत पोहोचण्याचा आहे.

सध्या समोर आलेल्या पहिल्या झलकीनुसार, या नवीन स्कूटरमध्ये काही मोठे बदल पाहायला मिळत आहेत. एथरच्या सध्याच्या मॉडेलमधील पॉलिमर पॅनेल्सऐवजी यात मेटल बॉडी पॅनेल्सचा वापर करण्यात आल्याचे दिसते. तसेच यात लांब सिंगल-पीस सीट आणि फ्लॅट फ्लोरबोर्ड देण्यात आला आहे, ज्यामुळे रोजच्या प्रवासात चालकास आणि कुटुंबास अधिक सोय आणि आराम मिळणार आहे. याशिवाय यात हँडलबर-माउंटेड हेडलाइट, फ्रंट अप्रॉनवर वाइड एलइडी डीआरएल (DRL), १४ इंचाचे फ्रंट व्हील आणि १२ इंचाचे रियर व्हील दिले जाण्याची शक्यता वर्तवली जात आहे.

'ईएल' प्लॅटफॉर्मची निर्मिती करताना कंपनीने देशभरातील सुमारे २६ लाख किलोमीटरहून अधिकच्या रिअल-वर्ल्ड रायडिंग डेटाचा वापर केला आहे. हा प्लॅटफॉर्म मॉड्यूलर असल्याने यात २kWh ते ५kWh क्षमतेचे बॅटरी पॅक बसवले जाऊ शकतात. तसेच यात नवीन सायलेंट गिअर-ड्राईव्ह मोटर, ऑन-बोर्ड चार्जर आणि लांब सर्व्हिसिंग इंटरव्हल्स दिले जाणार आहेत, ज्यामुळे वाहनाची देखभाल करणे सोपे होईल. बाजारात या स्कूटरची किंमत अंदाजे १ लाख रुपयांपासून १.२५ लाख रुपयांच्या (एक्स-शोरूम) दरम्यान असण्याचा अंदाज वर्तवला जात आहे. किंमतीच्या बाबतीत ही स्कूटर कंपनीच्या सध्याच्या 'रिझता' (Rizta) आणि '४५०' सीरिजच्या खाली स्थान घेऊ शकते, ज्यामुळे ओला इलेक्ट्रिक, टीव्हीएस, बजाज आणि हिरो मोटोकॉर्पच्या उत्पादनांना तगडी स्पर्धा मिळेल. २९ ऑगस्ट रोजी होणाऱ्या कम्युनिटी डे सोहळ्यात या स्कूटरच्या किंमतीसह सर्व फीचर्स आणि स्पेसिफिकेशन्सचा अधिकृत खुलासा केला जाईल.